EDITORYAL - Papel sa barangay vs pabuto

Daghan ang nahinangop niining pagmenos karon sa mga magpabuto diha sa kadalanan, apan kuwang pa gihapon tungod kay wala gyud hingpit nga nawala kining mga magpabuto.

Ebidensya niini mao ang may kapin pa sa usa ka gatos ka tawo nga nabuthan sulod lang niining buwana ug posibleng aduna pay madugang unyang gabii sa pagsugat sa Bag-ong Tuig.

Si Presidente Duterte miingon nga gusto na niyang hingpit na gyud nga idili ang pagpabuto sa tibuok Pilipinas, sama sa gibuhat niya didto sa Davao City.

Apan mag-unsa man ang kagustohan ni Duterte, kun ang mga Local Government Units (LGUs) kuwang sa paghatag og pagtagad. Makita gihapon sa mga aseras ug mga gagmay nga tindahan kining mga sekreto pagpamaligya og pabuto.

Ang mga barangay officials wala lang maglihok kay nahadlok siguro nga dili na unya sila botaran sa umaabot nga eleksiyon. Dako kaayo og papel ang mga opisyal sa barangay sa kaluwasan sa ilang mga lumolupyo gikan niining mga pabuto.

Kun ila pa nga panid-an kada adlaw ang mga tindahan sa ilang lugar aron lang pagsiguro nga walay namaligya og pabuto, mahimo nila nga kapugngan ang disgrasya sa ilang mga konstituwente.

Mohimo unta sila og tininuod nga kampanya batok sa pabuto bisan og walay kamandoan gikan sa itaas, sa ngalan sa serbisyo. Labing maayo gani nga ilang tigumon ang katawhan sa mga sitio aron pasidan-an kabahin sa sunog ug disgrasya tungod sa pabuto.

Dili unta kay kutob ra sa estorya, kun dili, kanunayon gyud nila ang paglibot sa mga sitio aron pahimangnoan ang katawhan. Sayod baya sila nga adunay mga tawo nga ang kinaiya mura’g lansang nga kun dili dukdokon, dili modulot.

Kun ang mga opisyal sa barangay mangunay paghimo niini, dili na lisud alang sa mga ginikanan nga wala sa’y pagpakabana sa pagbadlong sa ilang mga anak.