Budget alang unta sa Danao gibalhin sa Talisay

CEBU, Philippines - Gikatakdang palapdan ug padak-an ang buhatan sa kapolisan sa dakbayan sa Talisay sunod tuig, kini human ang Campo Crame nigahin og P13 milyones alang sa pagtukod sa modernong Talisay City Police Station. Si PSupt. Edgar Dampios, representante sa Engineering Department sa Police Regional Office (PRO-7) ug si Dr. Jomar Rubio, executive secretary ni Mayor Eduardo Gullas uban sa taga engineering office sa dakbayan, nisusi sa lugar kun asa himuon ang proyekto.

Matud ni PSupt. Emerson Dante, hepe sa Talisay City Police Station nga ang maong budget gikan sa Campo Crame gitagana gyud unta sa Danao City Police Station apan ang maong siyudad wala makapasar sa kwalipikasyon diin ang tukuron nga buhatan gidonar gyud sa PNP.

Hinungdan nga ang maong budget dali nga gibalhin sa Talisay kay sa PNP naman ang luna. Apan sa gihimo nga pakisusi, gamay ra ang kasamtangang luna nga giokupahan sa kapolisan apan mahimo kini kun makuhaan og gamay ang lugar sa Talisay City College.

 Si PSupt. Dampios niingon nga andam siya’ng mopasabot sa Campo Crame nga idayon ang proyekto sa Talisay kun makakuha sila og lugar sa TCC.

 Si Mayor Gullas sa iyang bahin nibutyag nga andam siya’ng modonar og luna gikan sa TCC ug adto ihatag sa lokal nga kapolisan kay daku naman kini nga bintaha ngadto sa mga Talisaynon nga mas palapdan pa ang serbisyo sa kapolisan.

 Asoy pa ni Dampios nga kun madayon man kini nga proyekto pinaagi sa pagsanong sa Campo Crame hayan makasugod kini sa unang kwarter sunod tuig. (BANAT NEWS)