Si Marcos ug ang Yolanda
Sa pagtimaan sa ikatulong anibersaryo sa mangtas nga bagyong Yolanda, nga natunong sa pagtugot na sa Korte Suprema nga ilubong ang patayng lawas ni kanhi Presidente Ferdinand Marcos sa Libingan ng mga Bayani, bisan ang mga biktima sa labing bangis nga katalagman sa kasaysayan sa kalibotan padayong gihamok sa mga binuhatan sa napukan nga diktadura.
Labing dakong babag sa nalangay na pag-ayo nga pagtukod sa kaliboan ka kabalayan alang sa mga bahin sa amihanang Sugbo nga labing nagusbat sa bagyo mao ang kamandoan ni Marcos dul-an sa upat ka dekada nang nilabay paghimo sa mga isla sa Bantayan ug Camotes nga kalasangan ug katunggan ug busa di mahimong matitulohan.
***
Niadtong 1981, si Marcos niluwat og Proclamation No. 2151 nga nideklarar sa 14,183 ka ektarya sa isla sa Bantayan nga naglakip sa mga lungsod sa Santa Fe, Bantayan ug Madridejos nga wilderness area. Sa samang tuig, si Marcos nipakanaog og Proclamation No. 2152 nga nagdeklarar sa tibuok 20,964 ka ektarya sa mga isla sa Camotes nga naglakip sa mga lungsod sa San Francisco, Pilar, Poro ug Tudela nga mangrove forest reserve.
Kay bisan ang Korte Suprema di mang kasukwahi ni Marcos, way nangahas paglalis sa iyang mga proklamasyon. Wa hinuon makapugong ang iyang diktadura sa mga molupyo ug mga negosyante pagtukod og kabalayan ug beach resorts ug pagpamaligya sa ilang mga luna ginamit ang tax declarations.
***
Bisan wa na si Marcos ug unom na ka presidente ang nagbanus-banos pagduma sa Malakanyang, nagpabiling pakyas ang mga paningkamot pagbasura sa iyang duha ka proklamasyon. Nabawo ang mga paningkamot sa mga kanhi kongresista, silang Clavel Asas-Martinez sa ikaupat nga distrito ug Red Durano sa ikalimang distrito, tungod sa kakuwang og suporta sa Senado.
Ipadayon nilang Kongresista Benhur Salimbangon sa ikaupat nga distrito ug Kongresista Ace Durano sa ikalimang distrito ang kawsa. Ning higayona, di na magmingaw kay nipasalig si Senador Richard Gordon sa pagtabang nila.
***
Sa siya pay Yolanda Rehabilitation Czar, giawhag ni Senador Panfilo Lacson si kanhi Presidente Noynoy Aquino pagluwat og proklamasyon aron malaktod ang pagdeklarar sa Bantayan ug Camotes nga matitulohan na. Sa wa pa mapupos ang iyang termino, nahingpit ni kanhi Environment Secretary Ramon Paje ang komprehensibong survey sa mga luna sa mga isla nga mahimo nang titulohan ug sa mga luna nga padayong panalipdan.
Hinaot nga kapuslan nilang Salimbangon, Durano ug Gordon ang survey sa Department of Environment and Natural Resources aron mas paspas nga mapatuman ang reclassification sa mga luna sa Bantayan ug Camotes. Ang kalapad sa kadaot ni Yolanda ug ang nausik nga tulo ka tuig di hinuon makaabsuwelto sa pamunoang Aquino sa kapakyas pagtukod gilayon sa kabalayan sa mga biktima.
- Latest
