Mga wali sa Huwebes Santo
Nangahas kog hubad sa mga wali ni Pope Francis sa paghugas sa mga tiil sa Santos nga Misa sa Kataposang Panihapon sa mga Huwebes Santo niadtong 2013 ug 2014. Niang iyang wali sa Casa del Marmo, prisohan sa mga batan-on sa Roma, sa Huwebes Santo sa 2013:
Makapatandog ni, Si Hesus--ang Ginoo--nanghugas sa mga tiil sa iyang mga disipulo. Si Pedro wa kasabot, nibalibad. Apan gipasabot siya ni Hesus: "Nahibawo ba mo sa akong gihimo? Gitawag ko ninyong Magtutudlo ug Ginoo--ug sakto mo, kay ako mao kana. Kon ako, inyong Magtutudlo ug Ginoo, nihugas sa inyong tiil, angay sab mong manghugas sa mga tiil sa usag usa."
***
Mao ni sanglitanan sa Ginoo: Siya’y labing mahinungdanon, ug nanghugas siya og tiil, kay ang labing taas kinahanglang moalagad sa uban. Simbolo ni. Ang paghugas sa mga tiil nagkahulogan: "Nag-alagad ko nimo." Ug kita kinahanglan sang manghugas sa mga tiil sa usag usa matag adlaw. Apan unsa may ipasabot ini? Nga kitang tanan magtinabangay. Usahay masuko ta sa usa ka tawo, apan… kalimti na, kon mangayo siya og pabor, alagari siya.
Tabangan ang usag usa: mao ni gitudlo ni Hesus nato ug mao ni akong gihimo sa tibuok nakong kasingkasing, kay mao ni akong katungdanan. Isip pari ug obispo, angay kong moalagad ninyo. Katungdanan ning nanukad sa kasingkasing: Nahigugma ko paghimo ini kay mao ni gitudlo sa Ginoo nako. Kamo sab, tabangi ang usag usa, sa tanang panahon.
Karon atong himuon ning seremonya paghugas sa mga tiil, ug atong hunahunaon: "Andam ba gyod ko pag-alagad, pagtabang sa uban?" Atong hunahunaon nga kini ang pagpangga ni Hesus, nga gihatag ni Hesus, kay mao ni tinuod nga hinungdan nganong si Hesus nianhi: pag-alagad, pagtabang nato.
***
Ug niang iyang wali dayong hugas sa mga tiil sa mga pasyente sa S. Maria della Provvidenza, rehabilitation ug long-term care facility sa Roma:
Nadunggan nato nga si Hesus nihimo ini sa Kataposang Panihapon: Timaan ni sa panamilit. Ginoo siya ug nagpaka suluguon, atong suluguon. Mora ning kabilin. Angay sab mong mahimong suluguon sa usag usa. Gihimo ni niya tungod sa Gugma. Mao ni kabilin ni Hesus nato. Sa karaang panahon ang kadalanan hugaw, ug sa pagsud sa katawhan sa pinuy-anan aron mangaon gikinahanglang hugasan ang ilang tiil. Si Hesus nihimo ning gimbuhaton sa ulipon, sa suluguon. Iya ning gihimo nga atong kabilin. Angay tang mahimong suluguon sa usag usa.
Ang Simbahan karon nagtimaan sa Kataposang Panihapon diin si Hesus nisaulog sa Misa, ug nanghugas sab sa mga tiil, nga nagpahinumdom nga angay tang mahimong suluguon sa usag usa. Atong hunahunaon unsaon nga mas maalagaran pang ubang tawo. Kay mao ni gusto ni Hesus nga atong himuon sa usag usa.
- Latest
