Kinsa'y nakabentaha sa debate?

Kon imong balansehon pag-ayo base sa atong nakita sa Presidential Debate kaniadtong Domingo dinhi sa Sugbo, si kanhi DILG Secretary Mar Roxas maoy giisip ni Vice President Jejomar Binay nga labing lig-on nga kontra niya sa piniliay karong Mayo 9.  

Pagkahuman sa debate, gusto unta nga makiglamano si Roxas kang Binay, apan wala kini dawata. Klaro kaayo nga naghambin og kasuko kaniya si Binay kay imbes pakauwawan niya si Roxas atol sa debate, siya na man hinuon ang nauwawan.

Bisan si Grace Poe misuway usab paghimo'g paagi aron maulawan si Roxas, apan wala magsilbe kay milutaw gayud ang kamatuoran. Si Rodrigo Duterte mao gihapon, mihimo'g paagi aron pagdaot ni Roxas, apan wala makadulot.

Si Binay diay maoy nakapalangan pagsugod sa debate kaniadtong Domingo kay niinsister siya nga magdala og mga kodigo, nga naglakip sa mga dukomento, aron iyang gamiton pagpanubag sa pangutana.

Aron dili malangan pagsamot ang pagsugod sa debate, napugos na lang gyud ang Comelec ug ang tigpasiugda sa Presidential Debate nga tugtan na lang si Binay pagdala sa iyang mga dukomento, apan gipasidan-an nga dili ipagamit.

Atol sa tinubagay nila ni Roxas ug Binay, niinsister gyud si Binay paggamit sa dukomento apan gibadlong siya.

Giingnan ni Roxas si Binay nga mas maayo pa og gidala usab niya ang report gikan sa Commission on Audit (COA) ug sa Ombudsman nga nagpakita sa dakong kurakot sa pagpatukod sa mga proyekto sa Makati City atol nga mayor pa si Binay kaniadto.

Nahinumdom mo nga ang mayor sa Makati City nga anak ni Binay gi-dismiss man gani sa serbisyo kay namatud-an sa Ombudsman nga sad-an tungod kay "overpriced" ang kantidad sa pagpatukod sa Makati City Parking building nga gisugdan sa iyang papa kaniadto?

Kanunay nga nanglipaghong ang nawong ni Binay kon maghisgot na og isyu nga pangurakot. Si Grace Poe usab misuway pagguba sa dungog ni Roxas pinaagi sa pag-ingon nga masabot nga walay pagsalig si Presidente Aquino kang Mar kay atol sa Mamasapano incident, si PNoy niadto pa gyud sa Mindanao bisan risgo sa iyang kinabuhi.

Nasayod man unta si Grace Poe nga si Roxas wala pahibaw-a sa mao nga police operation nga mikalas og 44 ka sakop sa SAF. Dili man usab sayop kon moadto ang presidente sa Mindanao kay dako kaayo kadtong mao nga hitabo.

Nauwawan usab si Duterte kay diha nga gusto niya nga ipalutaw nga si Mar Roxas nagpasagad lang sa taga Leyte atol sa pag-igo sa bagyong Yolanda, nasupalpal siya kay napamatud-an ni Roxas nga didto na diay siya sa Tacloban City bisan sa wala pa moigo ang bagyo.

Nahibaw-an sa balita nga 16 ka adlaw nga si Roxas niistar sa Leyte bisan sa wala pa gani moigo ang Yolanda. Nahinumdom mo niadtong nagsakay si Roxas og motorsiklo aron lang gyud makaabot siya sa hilit nga dapit sa Leyte, unya gisaway pa tungod  kay wala magsul-ob og helmet?

Kon imo lang gyud nga timbang-timbangon pag-ayo, walay mga unod ang mga gipanulti ni Binay ug Duterte atol sa debate. Nisamot nga daghang wala makagusto ug wala gyud ganahi ni Duterte diha nga niingon siya nga ang tawo nga dili maantigo mopatay dili angay'ng mahimong presidente.

Gibalik-balik ra ni Duterte nga sulbaron niya ang problema sa drugas gikan sa tulo ngadto sa unom ka buwan, nga dili gayud katuohan. Apan gipangutana kon unsaon niya, igo ra moingon nga todason ang mga tawo nga nalambigit.

Gibasol pa ni Duterte si Roxas nga walay gihimo sa problema sa drugas sulod sa New Bilibid Prisons sa Muntinlupa, apan nasupalpal pag-usab si Duterte kay gipahinumdoman siya ni Roxas nga ang New Bilibid Prisons dili ubos sa pagdumala sa DILG, kon dili, sa Department of Justice.

Nindot nga adunay gipahigayon nga presidential debates kay matan-aw sa katawhan kon kinsa ang angayan nga himoong presidente. Apan subo lang palandungon kay daghan pa ang gusto sa usa ka kandidato kay isog, unya magkinamot nga magkaon aron magpakuha'g hulagway.

Wala nila paminawa kon kinsa ang adunay katakus sa pagpalambo sa ekonomiya ug tarong nga mopadagan sa kagamhanan.