Venancio Loyola unang kampiyon sa 2025 CEPCA monthly tourney

CEBU, Philippines — Si Arena Grandmaster Venancio Loyola Jr. milugwa nga unang kampiyon sa 2025 nga edisyon sa binulan nga torneyo sa Cebu Executives and Professionals Chess Association (CEPCA) monthly tournament niadtong Dominggo, Enero 26, didto sa Robinsons Galleria Cebu.       

Nagtabla unta si Loyola uban nilang Kristina Concepcion Belano, Restituto Lanorias ug Antonio Cabibil nga mirehistro sab og 5.0 puntos apan si Loyola ang misakmit sa Enero nga titulo tungod sa mas taas niyang tiebreaker.

Gawas nga mibulsa og P3,000, si Loyola naka-angkon sab og luna sa CEPCA "Battle of Champions" karong Disiembre.

Si Belano nalandig sa ikaduhang dapit samtang sila si Lanorias ug Cabibil mi-okupar sa ikatulo ug ikaupat nga puwesto.

Sila si Maria Kristine Lavandero ug Peterson Sia mipahiluna sa ikalima ug ikaunom nga dapit bitbit ang 4.5 puntos matag usa.

Naglangkob sa Top 12 mao sila si Vivencio Mendoza Jr., Jessie Supangan , Manuel Abucay Jr., Amado Olea Jr., Romualdo Muralla ug Jonathan Canque nga dunay parehong 4.0 puntos.

Sa laing bahin, ang labing maayo sa tagsa-tagsa nila ka mga kategoriya mao sila si Vivencio Mendoza Jr. (60 Above), Cedrick Li Benlot (12 Under), Peterson Sia (Cepcan A), Manuel Abucay Jr. (Cepcan B), ug Angel Chelsea Tinga-al (female).