Pork ang AKAP
Klarong ebidensiya nga pork barrel ang Ayuda Para sa Kapos ang Kita Program (AKAP): Gibalhin kini ni Presidente Ferdinand Marcos Jr. gikan sa Department of Social Welfare and Development (DSWD) ngadto sa Department of Labor and Employment (DOLE).
Sagpa sa niinsistir nga social workers sa DSWD ang nagbuot kinsay hagatan sa AKAP ug dili ang mga alyado ni House Speaker Martin Romualdez: Gipahibawo ni Secretary Amenah Pangandaman sa Department of Budget and Management (DBM) nga luwatan lang ang kuwarta sa AKAP kon duna nay klarong mga lagda gikan sa DOLE.
* * *
Sa sinugdanan pa lang, kuwestiyonable nang AKAP. Nahibulong ang DSWD nga gisukip sa bicameral conference committee sa ilang 2024 budget. Nikumpisal si DSWD Secretary Rex Gatchalian niadtong 2023 nga wala sila kahibawo unsaon pagpatuman ang AKAP.
Pero sa Agosto ning tuiga, walo ka buwan human gipabaha ang AKAP, nipagawas si Gatchalian og mga lagda nga nagtakda kinsay hatagan, pila ang ihatag nga kuwarta o bugas ug nga DSWD ang modumala sa paghatag. Pero nakabuylo nang mga kongresista ni Romualdez pagsalida sa Facebook Live nga silay hawod sa AKAP.
* * *
Kay nabisto mang AKAP nga resulta sa maniobra ni Romualdez sa budget sa 2024, wala gahini sa mga senador og bisan usa ka dako sa ilang bersiyon sa budget sa 2025. Pero nabanhaw ang P26 bilyones nga AKAP sa bicam human nisugot si Romualdez nga ilang bahinon–P21 bilyones sa mga kongresista ug P5 bilyones sa mga senador.
Ambot makapugong ba ang DOLE sa gipasalig nga P200 milyones ang AKAP sa kada senador ug P100 milyones sa kada kongresista.
* * *
Gipasalig ang AKAP nga tabang sa mga trabahante kansang binuwan nga suholan nga P23 mil paubos dili paigo sa inadlaw nilang panginahanglan. Maong angay lang nga DOLE, nga maoy nanglista sa minimum wage earners, maoy mopatuman.
Pero ambot mapatuman ba sa DOLE ang mga lagda. Kay sama nga ang social workers sa DSWD niduko sa singka sa mga kongresista nga ila rang mga dumadapig ang gipadawat, maglisod sang mga sakop ni Labor Secretary Bienvenido Laguesma pagkumbinser sa mga politiko nga wala diay silay labot sa pundo nga giplano nang daan nga ipabaha sa eleksiyon karong Mayo.
* * *
- Latest
