Riding in tandem nga namusil nadakpan
CEBU, Philippines — Nadakpan sa gihimong hot pursuit operation sa Carcar City Police Station ang duha ka mga suspek nga nagpatay sa usa ka 28 anyos nga babayeng call center agent niadtong Huwebes sa buntag, Marso 27, 2025 didto sa Sitio Luan-Luan, Barangay Poblacion 1, Dakbayan sa Carcar City.
Ang mga suspetsado mao sila si Alberto Aguilar Diez, 39, taga Sitio Kapusuan, Barangay Poblacion, Lungsod sa Sibonga ug Aljune Sonsona Serenio, 35, nagpuyo sa Sitio Tapon, Barangay Napo, Dakbayan sa Carcar.
Samtang ang biktima mao si Yessha Enad Sato, 28, minyo, call center agent, residente sa Sitio Luan-Luan, Barangay Poblacion 1, Carcar City.
Una niini, ang Carcar City Police Station nakadawat og tawag labot sa nahitabong pagpamusil sa dapit.
Gi respondehan dayon kini sa kapulisan apan sa pag-abot nila sa lugar wala na didto ang biktima kay gidala dayon kini sa iyahang mga kabanay sa Carcar District Hospital ug gibalhin sa Vicente Sotto Memorial Medical Center apan giingong nakabsan gyud kini sa kinabuhi.
Sa imbestigasyon sa Carcar City Police Station dunay nakakita ug nakaila sa mga suspetsado nga maoy naghimo sa krimen.
Hinungdan nga nihimo dayon og follow-up ug hot pursuit operation ang kapulisan ug natultolan ang duha ka mga suspetsado.
Na-recover sa kapulisan ang usa na itom nfa Suzuki Smash 125 nga wala'y plate number nga maoy gigamit sa mga suspetsado nga getaway vehicle.
Na-recover sa otoridad kang Albert Diez ang usa ka Jericho 9mm pistol, duha ka magazine niini, 20 ka bala sa kalibre .9mm, usa ka silencer, cellphone ug usa ka itom nga backpack.
Samtang na-recover kang Aljune Sereno ang usa ka kalibre .45 STI Apeiro, usa ka silencer, usa ka magzine ug unom ka bala sa kalibre .45.
Sa crime scene na recover sa kapulisan ang usa ka basiyo sa bala.
Nasayran sa kapulisan nga ang motibo sa mga suspetsado sa pagpatay sa biktima tungod kini sa utang.
Giandam na sa kapulisan ang kasong murder nga ipasaka batok sa mga suspetsado. IBM BANAT NEWS
- Latest
