Driver ng mayoralty candidate, itinumba

MANILA, Philippines — Patay ang driver ng isang mayoralty candidate matapos pagbabarilin sa loob ng tahanan nito sa Brgy. Zone 3, Bangued, Abra kamakalawa ng gabi.

Kinilala ang biktima na si Juanito Gammong, 58-anyos ng Brgy. Dangdangla, Bangued, ang kapitolyo ng nasabing lalawigan.

Si Gammong ay driver ni Lenin Benwaren, mayoralty candidate ng bayan ng Tineg sa ilalim ng Asenso Party.

Pansamantalang nanunuluyan ang biktima sa Brgy. Zone 3, Bangued.

Ang lalawigan ng Abra ay kabilang sa mga “areas of immediate concern” kaugnay ng gaganaping halalan sa Mayo 2025.

Sa report ng Abra Police, alas-7 ng gabi, kararating lamang ng biktima sa kanilang tahanan para magpahinga nang sundan sa loob at pagbabarilin ng nag-iisang salarin.

Nagtamo ang biktima ng tatlong tama ng bala sa katawan na bagaman at nagawa pang maisugod sa Abra Provincial Hospital ay idineklara nang dead-on-arrival sanhi ng tinamong tatlong tama ng bala na naglagos sa katawan.

Ang suspect ay mabilis na tumakas patungo sa hindi pa malamang destinasyon na sinamantala ang kadiliman ng paligid.