Mga establisamento sa Cebu City kinahanglang mokuha og ESAP

CEBU, Philippines — Gipahibalo sa Cebu City Environment and Natural Resources Office ang tanang establisamento sa Dakbayan sa Sugbo nga mamahimo na kining maka-apply ug makakuha sa ilang certificate alang sa Environmental Sustainability Action Plan sa duha ka lugar.

Anaa kini sa buhatan sa CCENRO nga nahimutang sa ikaduhang andana sa Cebu City Hall Satellite Office atbang sa La Nueva Supermarket o sa karaang Prince Warehouse sa M.C. Briones Street sa Barangay San Roque niining siyudad ug ang ikaduha anaa kini sa ikaupat nga andana sa Gaisano Mall o GMall.

Kinahanglan nga adunay ESAP ang usa ka establisamento dako o gamay aron nga maisyuhan kini og business permit ug aron nga masiguro nga masunod ang mga environmental practices ug local regulations sa siyudad. Ug kong ang establisamento mapakyas sa pagpakita sa ESAP certification o pagdumili sa pagtugot sa inspeksiyon posibleng makabayad kini og multa gikan sa P2,000 ngadto sa P5,000 ug pagkapriso o mabawian og business permit.

Alang sa dugang kasayoran mahimong motawag sa CCENRO sa ilang hotline sa mga numero nga 349-3958. — /BDB (BANAT NEWS)