Nag ungaw sa peligro ang kinabuhi sa mga bata

Namilegro ang kinabuhi sa mga tinun-an apil ang mga magtutudlo sa pampublikong tunghaan sa Barangay Buhisan sa dakbayan sa Sugbo tungod sa gabok nga yuta nga gitukoran sa eskwelahan nga misangpot sa pagpangliki na niini. Ang nakatampo sa mga dagkong liki ang pagtay-og sa pipila ka linog kaniadto matud pa sa mga eksperto nga mitan-aw sa dapit.

Nagkahiusa ang Mines and Geoscience Bureau sa DENR ug ang kagamhanan sa dakbayan sa Sugbo nga dili na gyud luwas ang dapit alang sa mga tawo hinungdan nga gipaubos kini sa state of emergency kay dinaliay ang paglihok niini ilabi na karon nga nasinati ang mag pag uwan uwan.

Gani dihang gisusi sa inspector sa City Engineering Office paspas kuno kaayo ang paglihok sa yuta diin unang nagrabehan ang buhatan sa principal sa tunghaan kay dagko na kaayo ang kang-al sa bongbong ug sa flooring niini. Matud sa engineer nga hallow na ang pundasyon sa principal's office nga nagsilbeng base usab sa ekwelahan nga anaa sa ibabaw nga bahin.

Gikordon na usab kini sa CCDRRMC ang dapit sa tunghaan nga adunay nakitang liki aron dili na masudlan og tawo kay humok na ang yuta nga posibleng mobigay na ilabi na nga basa ang yuta tungod sa pag ulan.

Gisuna nako ang inspector sa city engineering kon kanus-a kinahanglang ihikling ang mga tinun-an, iyang tubag nako sa labing dali nga panahon kay basin maapsan sa dautang panghitabo simbako lang. Seryoso sila sa ilang giingon nga pabakantihan na ang tunghaan.

Apan asa man ibalhin ang mga tinun-an? Madala ra ba og module ang klase pareha kaniadto sa Covid? kini ang kahingawa sa mga ginikanan ug sa mga opisyal sa baranggay kay matud pa naanad na sila sa sitwasyon. Gawas pa gustohon man nila nga mabalhin apan wala pay kabalhinan. Naa na untay luna nga andam na ang tag-iya nga ibaligya apan nasangit man ang proseso kaniadto pa ug maoy giawhag sa baranggay Buhisan nga mapadayon na.

Naa naman diay ning lunaa nganong dugay dugayon man? Ang bola karon naa sa Local School Board, unta prioridad nila kining kay kinabuhi ug kaugmaon sa mga bata ang nakataya niini. Kinsa may dili gustong makabalhin og mas luwas mga lugar apan wala man ang ilang kabalhinan maong mapugos ang mga tinun-an, mga ginikanan ug magtutudlo nga mamahala nalang sa ilang kaluwasan kay wala man silay paingnan.

Hinuon naka template naman ang pamaagi sa modular learning nga gamiton panahon nga magdaut ang panahon apan lahi ra gyud kaayo kong nilawas ang pagtudlo aron makakat-on gyud ang mga estudyante.

Apan mas mahinungdanon labaw sa tanan ang  kinabuhi sa mga tinon-an nga dili mahimong ibaliwala lang.