Cebu City aduna pay dakong ikalambo – Archival
CEBU, Philippines — Si incumbent Cebu City Councilor Nestor Archival kinsa nikandidato isip mayor karong umaabot nga eleksiyon sa Mayo 2025 atol sa pagpakighinabi niini sa #KnowYourCandidate sa The Freeman (igsuong publication sa Banat News) nagkanayon nga daghan og problema nga giatubang ang siyudad karon.
Matud ni Archival nga nakita niya nga aduna pay dakong ikalambo ang siyudad sama sa giandam niya nga mga programa nga naglangkub sa sustainable development—sustainable power, sustainable water, food production, sustainable infrastructure, internet connections, greening ug mitigation sa climate change.
Nahisgutan usab ni Archival ang kabahin sa problema sa baha, traffic ug basura.
Gipadayag ni Archival nga tutokan usab niya ang revenue generation sa siyudad diin palambuon ang kaloleksiyon sa buhis.
Lakip usab nga palambuon ang serbisyo sa city hall sama sa aplikasyon sa business permit human nga daghang siya’ng nadawat nga reklamo mahitungod sa mga business permit nga dugay nga maproseso.
Gituki ni Archival ang problema kabahin sa baha diin gipadayag niya ang lakip sa mga angayang buhaton pagsulbad niini nga mao ang pagpatuman sa declogging ug desilting sa mga kasapaan diin kinahanglan nga kuhaon ang mga hugaw, yuta ug mga bato aron nga dili na molapaw ang tubig sa mga sapa panahon sa uwan ug tinud-on ang pagpatuman sa siyudad ang nasudnong balaod nga mao ang “Rain Water Catchment” ug pagpahigayon og tree planting.
Kabahin sa problema sa trapiko usa sa iyang nakitang solusyon niini mao ang pagpadayon sa Cebu Bus Rapid Transit ug ang pagbutang og daghang underground o overhead parking area sa siyudad.
Ang kabahin sa problema sa basura gibutyag ni Archival nga nausik sa siyudad ang kapin P400,000,000 matag tuig alang sa basura apan hangtud karon nagpabilin pa kining problema.
Gipadayag usab ni Archival nga 20 ka tuig na siya nga nagtuon ug nagbansay-bansay sa hustong sanitation sa siyudad nunot niini nagkuha siya og 1,000 ka kilong basura gikan sa mga merkado matag adlaw aron kini i-compost samtang kadtong mga nakolektang plastik gihimo nilang hollow blocks. BDB BANAT NEWS
- Latest
