Mayang (159)
“ANG sarap ng pagkain! Gusto ko na tuloy dito manirahan sa Pinamalayan,’’ sabi ni Colonel Allen Buenviaje matapos kumain. “Busog na busog ako!’’
“Masarap talaga dito sa bayan namin, Colonel. Mas lalo pong masarap magbakasyon dito kapag summer,’’ sabi ni Mayang.
“Talaga?’’
“Opo. Sa piyesta po inaanyayahan ka namin at iyong pamilya. Marami pong papasyalan dito sa amin. Marami rin pong kakainang restawran na napakasarap ng luto,’’ sabi pa ni Mayang.
“Kailan ba ang piyesta rito, Mayang?’”
“Next month na po—Abril 24—napakasaya po rito.’’
“Aba sige darating kami ng pamilya ko—apat kami. May matutuluyan bang mga hotel dito?”
“Marami po. Wala pong problema sa mga hotel, Colonel.”
“Ano nga yung sinabi mong resort, Jeff. Maganda ba roon?’’
“Recodo Beach Resort po. Maganda po roon. Parang Boracay po—malinis ang puting buhangin. Malinaw po ang dagat.”
“Wow! Yan ang gusto ko. Matutuwa sigurado si Misis at dalawa kong anak.”
“Sigurado po, Colonel. Magsasawa sila sa pagsu-swimming. Kapag nagsawa naman sa dagat, meron din ditong ilog na paliliguan. Napakalinis po ng tubig,’’ sabi ni Jeff.
“Sige darating kami sa Abril 24. Magti-text ako sa iyo, Mayang or Jeff.’’
“Sige po. Hihintayin namin kayo,’’ sabi ni Mayang.
“Salamat sa inyo.”
Nagpaalam na si Colonel.
Babalik na siya sa Maynila.
Inihatid siya sa bus terminal ni Jeff.
(Itutuloy)
- Latest
