Labing unang Sinulog Men's Open volleyball tourney mosikad na
CEBU, Philippines — Miabot ngadto sa 14 ka teams ang mag-ilog sa korona sa labing unang Sinulog Men's Open Volleyball Tournament nga gikatakdang mosikad karong adlawa (Huybes, Enero 16) didto sa Cebu City Sports Institute (CCSI) Gym sa Barangay Sawang Calero.
Gibahin sa duha ka brackets ang mga entranteng koponan.
Ang CESAFI champion University of Cebu (UC) Webmasters maoy nangu sa lig-ong mga kandidato nga mosakmit sa titulo nga naglangkob sab sa Amigos, Atty. Dico, DPWH-VII, 8x8, DH Spikers, Revels, Flying Lemurs, USPH High School, CIT-U Wildcats, Volleyball Assassins, Lowkey Volleyball, CVA ug bisitang University of Bohol (UB) spikers.
Modagan sa tulo ka adlaw, ang torneyo giorganisa ni Cebu City Vice Mayor Dondon Hontiveros inabagan sa Sinulog Foundation diin si Blake Diao maoy commissioner.
Ang makampiyon mobulsa og P100,000 samtang ang mopahiluna sa ikaduha ngadto sa ikaupat nga dapit makadawat og P50,000, P20,000 ug P10,000.
- Latest
