Philippine team mikulit og makasaysayanong daog vs Thailand
CEBU, Philippines — Ang Philippine men’s national football team miposte og makasaysayanong daog batok sa gamhanang Thailand, 2-1, atol sa Leg 1 sa 2024 ASEAN Mitsubishi Electric Cup semifinals niadtong Biyernes sa gabii, Disiembre 27, didto sa Rizal Memorial Stadium sa kaulohan.
Mao kini ang labing unang daog sa Pilipinas batok sa Thailand sud sa 52 ka tuig sukad sa 1972 Jakarta Cup.
Si Sandro Reyes maoy unang naka-iskor sa habig sa Pilipinas sa ika-21 nga minuto.
Mitubag sab dayon hinoon ang Thailand pinaagi ni Suphanan Bureerat aron tablahon ang duwa sa ika-45 nga minuto.
Sikit na kaayo ang depensa sa duha ka mga protagonista sukad niadto.
Apan sa pinal nga minuto sa kulbahinam nga aksiyon, si Kike Linares milansang og goal nga nakapalutaw sa mga Pinoy ngadto sa panganod sa himaya.
Ang ikaduhang leg gikatakda karong Disyembre 30 didto sa Rajamangala National Stadium sa Bangkok.
- Latest
