Bogo Claws and Paws kampiyon sa unang NSA X Comfort Zone Ph 4x4 tournament
CEBU, Philippines — Ang Bogo Claws and Paws maoy gikoronahang kampiyon sa 30 Under division sa labing unang North Sports Apparel X Comfort Zone Ph 4x4 Basketball Challenge nga gipahigayon ning bag-ohay pa lamang didto sa Kapenarra Gym sa dakbayan sa Bogo, amihanang bahin sa Sugbo.
Gipayaka sa Claws and Paws ang Kwez Restobar sa final, 17-11, aron sakmiton ang gihandum nilang korona.
Gipangulohan ni Marlone Batac nga misakmit sa tropeyo isip MVP, ang ubang mga sakop sa Claws and Paws mao sila si Edmer Estoya,Charles Lequin, Jun Canton, ug Lee-Von Son.
Gawas sa mga maanindot nga produkto gikan sa NSA, mibulsa sab sila ig P12,000 nga ganting salapi, samtang si Batac nakabitbit og bag-ong sapatos gikan sa Comfort Zone Ph.
Wala hinoon maserohi ang Kwez Restobar gumikan kay nakadawat sila og P8,000 ug ingon man pahalipay gikan sa NSA. Giorganisa ni sports patron Marc Malazarte ug coach Serg Alburo, ang torneyo nahimong posible tungod sa suporta sa Kapenarra, Bogo City Centrum, Cafe Alto Bogo, ug Mackoys Lechon Belly.
Sunod nga kumbatihan mao ang 18 Under category nga gikatakda sa unang semana sa Septiembre. Ang manghawod mokubra og P10,000 nga premyo, samtang ang mopahiluna sa ikaduhang dapit mokabi og P7,000.
- Latest
