Wala na kaagwanta sa kainit mitalikod nalang

Miluwat na sa katungdanan isip secretary sa Department of Education si Bise Presidente Sara Duterte sa wala pay igong rason nga gihatag sa iyang pagbiya sa DepED nga moepekto sa Hulyo 19. Seguro ang uban nakugang sa kalit nga pag-resign ni VP Sara isip apan gidahum na kining daan nga mahitabo.

Nahisama man gud si Inday Sara sa bingka nga napiit sa kalayo sa ubos ug sa taas. Ang iyang amahan ug mga igsoon hilabihan nakasaway kang Presidente BBM nga maoy hinungdan usab nga nasuko ang First Lady Liza Marcos sa mga Duterte ug giapil niini si Inday Sara nga kanhi suod kuno sa pamilyang Marcos.

Wala na makaagwanta ang bise presidente maong nibiya nalang siya sa katungdanan nga gisangon kaniya sa Marcos administration isip kalihim sa DepEd. Kay kong magpabilin siya sa katungdanan mora’g usa siya ka piniriso nga nakagapos ang mga kamot ug binaatan ang baba nga walay kagawasan sa paglihok ug pag-estorya sa gusto niyang mahitabo sanglit giisip niyang suod nga higala si PBBM apan mas nagpasulabi gyud ang iyang pamilya.

Bisan seguro og adunay panagbingkil si Inday Sara ug ang iyang amahan nga si kanhi PRRD, apan espiso gyud gihapon ang dugo kay sa tubig ug dili ikalimod nga suod kaayo sa kasingkasing sa bise presidente ang iyang amahan ug tibuok niyang pamilya maong dili na ta mahibulong nga gitaklikdan niya ang iyang partner sa UniTeam.

Matud niya nga ang UniTeam panahon lang niadtong eleksiyon ug human naman ang eleksiyon ug napili sila sa gahum, karon nabungkag na gyud, bisan pa og dili gyud moingon sila nga wala nay kahiusahan sa partido apan ang mga tawo nga nagsunod sa panghitabo mao na ang makahukom nga bungkag lampinig na sila.

Daghang mga isyu nga nagpakahilum ang bise presidente sama sa isyu sa West Philippine Sea, playing safe ra siya niini kay dili ikalimod nga suod sa China ang iyang amahan. Hinuon, sa laing bahin, makasabot ra kita kay dili man pud siya direktang nalambigit sa ingon niini nga isyu kay ang iyang departmento mao man ang DepEd. Duna usay mga isyu nga nagpakita og suporta si Sara sa personalidad nga giisip karon nga kontra sa mga Marcos sama nalang kang Pastor Apollo Quiboloy nga suod sa kanhi presidente.

Tataw nga adunay mga isyu karon sa kagamhanan nga sukwahi sa prinsipyo sa bise presidente apan dili siya makabuylo sa pagsumpaki niini kay kabahin pa man siya sa gabinete. Apan karon nga wala, aw dinhi na nato makita ang katag, excited na ang mga tawo sa sunod nga panghitabo sa politika kay sa mga nakaila sa babaye’ng gikan sa Davao dili kini basta basta nga magpaawop ug magpadaugdaug lang kay manumbag man gani kini kong masobrahan sa iyang kalagot.

Sinugdanan pa lang kini sa drama nga mahitabo sa umaabot nga panahon sa politika sa nasud. Bisan og layo pa ang presidential election apan mas mobibo pa ang panghitabo sa mga character nga apil sa dakong reality show nga naglambigit sa mga opisyal sa gobiyerno.

Atangan nato ang mosunod nga pahina sa drama sa politika sa atong nasud.