DOE mipahimangno batok sa manago sa mga produktong petrolyo
CEBU, Philippines — Nipagawas og advisory ang Department of Energy kagahapon nga nagpahimangno sa retail outlets nga ginadili gyud ang hoarding sa mga produktong petrolyo.
Nakalatid sa Section 2 sa Presidential Decree 1865 ang pagdili sa pag-hoard o pagtago sa maong mga produkto ilabi na kun padulong mosaka ang presyo niini.
“Hoarding of petroleum products for retail is generally defines as refusal, or failure, to sell to the general public even when supply is available and customer has the ability to pay in cash,” tipik sa advisory sa DOE.
Nasayran nga ang makasupak sa maong lagda mapriso hangtud sa lima ka tuig o makamulta og P50, 000.
Ang DOE nanawagan usab sa mga nabiktima sa maong illegal nga buhat sa pagtahu gilayon sa ilang buhatan alang sa assistance pinaagi sa opisina sa OIC Director Atty. Russ Mark T. Gamallo sa telepono 0915-887 3357.
Nagkasaka na og maayo ang presyo sa mga produktong petrolyo sulod na sa pipila ka adlaw.
Gani pipila ka mga drayber sa mga pampublikong sakyanan ang nitiyabaw na tungod kay maglisod na sila og kuha sa target nila nga kita alang sa ilang pamilya tungod sa kamahal sa gasoline. MEL (BANATNEWS)
- Latest
