Nganong nanghudlat na sab

Sa makausa pa, gihudlat na sab ni Presidente Duterte ang lokal nga mga opisyal kon padayon nga luya ang pagpamakuna sa ilang mga lugar batok sa Covid-19. Gisugo niya si DILG Secretary Eduardo Ano sa pagsilot sa lokal nga mga opisyal nga naglangay-langay sa pagpamakuna.

Sama sa naandan nihit siyag detalye: Way lugar ni opisyal nga ginganlan, way insidente sa kalangay nga gihisgutan, way balaod nga giingong nalapas ug unsay silot nga ikapahamtang. Mahimong way kalainan sa nahauna niyang hulga pagpriso sa mga kapitan sa mga barangay nga may tapuktapok.

 * * *

Masabot hinuon ang iyang kamapanagan-on sa pag-detalye sa mga insidente sa kalangay sa pamakuna. Kay di siya kinahanglan nga motan-aw sa layo pagpangita sa tinubdan sa labing abunda nga kasayuran. Di siya kinahanglan nga magbutangbutang sa iyang mga kaatbang.

Iyang kaugalingong anak--si Davao City Mayor Sara Duterte Carpio--maoy nikumpisal nga nagmingaw na ang vaccination sites sa ilang kinaham nga syudad kay pipila na lang nipakita aron magpabakuna. Ambot tungod ba kay di makaako sa paghingan sa iyang kaugalingong anak ang ubang lokal nga mga opisyal na lang maoy gipasidan-an.

 * * *

O tingali tungod sa rason nga gibisto sa iyang anak nga hinungdan sa kaluya sa pagpamakuna. Di ang paglangay-langay sa lokal nga mga opisyal. Di ang kakuwang og kakugi sa lokal nga mga opisyal sa pagkumbinser sa katawhan sa pagpabakuna.

Kon dili ang brand sa bakuna nga kasagarang gitanyag sa vaccination sites--ang CoronaVac nga hinimo sa Sinovac sa China. Ug nahibawo tang tanan kinsay namugos pagpangompra sa Sinovac bisan napamatud-ang mas ubos og efficacy rate kay sa mga bakuna sa Estados Unidos.

 * * *

O tingali ang pasidaan sa lokal nga mga opisyal nanukad sa wa mapabuhagay niyang kasuko sa kamapangahason sa iyang anak sa pagkuwestiyon sa iyang paboritong bakuna. Tingali igo lang nipahungaw sa nagpuot niyang kasuko sa mga wa mobilib sa bakuna sa iyang paboritong nasud.

Bisan sa iyang taras sa pagdaginot pagtubag sa bisan unsang pasangil batok sa iyang pamunoan, way ek ang presidente sa demanda sa iyang anak nga di na padad-an og Sinovac ang Davao. Mas lanog ang tubag ni vaccine czar Carlito Galvez Jr.: Gipadad-an niya ang Davao og dugang Pfizer.