Litong-lito na

Dear Dr. Love,

Magandang araw po sa inyo! Tawagin n’yo na lang po akong Lia. Isa po akong dalagang nasa edad 25, may maayos na trabaho at simple lang ang pamumuhay.

Sumulat po ako sa inyo dahil litong-lito na po ako sa isang lalaki na matagal ko nang kakilala.

Matagal na po kaming magkaibigan ni Jay. Mabait siya, maalaga, at parang laging nandiyan para sa akin sa oras ng pangangailangan. Napapansin ko rin po ang mga tingin niyang may kahulugan at ang mga biro niya na para bang may halong pagseselos kapag may ibang lalaking lumalapit sa akin.

Marami na rin po ang nagsasabing may gusto siya sa akin—mga kaibigan namin, pati kapatid ko.

Pero kahit kailan, hindi niya diretsahang sinabi. Wala siyang ginagawa para umamin o manligaw. Nahihirapan po ako.

Dapat ko na po bang tanungin siya nang direkta? O hayaan ko na lang hangga’t hindi siya handang magsalita?

Ayoko pong umasa, pero hindi ko rin po maiwasan ang umasa.

Ano po ang dapat kong gawin?

Lia

Dear Lia,

Maraming salamat sa iyong pagtitiwala.

Una sa lahat, nakakatuwang malaman na may isang lalaking tila may espesyal na damdamin para sa iyo—pero naiintindihan ko ang iyong kalituhan. Minsan, kahit halata na ang nararamdaman ng isang tao, pinipili pa rin nilang manahimik—maaring dahil sa takot, pagkalito, o dahil iniingatan ang pagkakaibigan.

Ang mahalaga ngayon ay ang iyong kapayapaan.

Kung ang sitwasyon ay nagsisi-mula nang makaapek-to sa iyong emosyon at iniisip mo ito araw-araw, maaaring panahon na para sa isang bukas na pag-uusap. Hindi mo kailangang magpahiwatig na gusto mo rin siya, kundi itanong mo lang nang mahinahon at may respeto: “Jay, may mga bagay akong napapansin, at gusto ko lang malaman kung tama ang kutob ko…”

Sa ganitong paraan, binibigyan mo rin siya ng pagkakataong maging tapat—at ikaw, ng kalinawan.

Tandaan mo, Lia hindi lahat ng hindi umaamin ay walang nararamdaman.

Pero ang hindi pagsasalita ay hindi mo kailangang pagtiisan nang matagal.

Maging tapat sa sarili mo, at huwag matakot sa katotohanan—masakit man o masaya.

DR. LOVE