‘Di na pwede Mag-Simbang Gabi

Dear Dr. Love,

Ayaw na akong payagan ng mama ko na magsimbang gabi. Nakita niya ang mga klasmeyts ko na naghaharutan lang sa labas ng simbahan at naglalambingan. Hindi ko naman mga tropa ‘yun, ibang grupo ng klase namin sila. Malinis ang intensyon ko kaya ako nagsisimba.

Pero ewan ko pati ‘yung mga kabataang wala namang ginagawang masama nadadamay dun sa mga nanggugulo sa simbahan. Minsan nga may away pa. Ano bayan?

Ayesha

Dear Ayesha,

Nakakalungkot naman ang sitwasyon mo. Naiintindihan ko ang frustration mo dahil tila nadamay ka sa mga maling gawain ng iba, kahit wala ka namang kinalaman doon. Nakakatuwa na pinapahalagahan mo ang pagsisimba at ang tunay na diwa ng Simbang Gabi.

Siguro, maipapaliwanag mo ito sa mama mo nang mahinahon. Sabihin mo na hindi mo kontrolado ang ginagawa ng iba, pero sigurado kang wala kang ginagawang masama. Ipaalala mo rin na gusto mong magpatuloy sa tradisyon ng Simbang Gabi hindi lang dahil sa faith mo, kundi para rin sa mga blessings na dala nito sa Christmas season.

Kung ayaw pa rin niyang pumayag, baka pwede kang mag-adjust, tulad ng: Sumama sa pamilya: Anyayahan mo ang mama mo o ibang kamag-anak na sabay kayong magsimba para makita niyang seryoso ka talaga.

Hanapin ang tamang oras: Baka may ibang schedule ng misa na mas tahimik o hindi crowded, para iwas na rin sa mga nagkakagulo.

Sana maayos mo ito. Mahal ka ng mama mo kaya siya nag-aalala, pero dapat ding maintindihan niya na kaya mong magpakita ng maturity at sariling pananagutan

Alam naman ni Lord ang tunay na hangarin ng ating puso sa ating mga ginagawa. Merry Christmas ha!

DR. LOVE