Sino ang baog?

Dear Dr. Love,

Sabi nila tigilan ko na raw ang katangahan ko. Ako kasi ang sinisisi ng mister ko kung bakit hindi kami nagkakaanak. 

Sana raw noong una pa hiniwalayan na niya ako pero umasa pa raw siya na magkakaanak kami. Ngayon pitong taon na kaming magkasama pero wala pa ring anak. Galit sa akin ang mga magulang niya dahil hindi raw sila nagkaapo sa amin. 

Sa palagay ko, hindi ko naman kasalanan kung hindi kami magkaanak dahil hindi ko talaga alam kung baog ako. Ayaw naman ng mister ko na magpadoktor kami para magkaalaman na kung sino sa amin ang baog. 

Esem

Dear Esem,

Napakabigat ng iyong pinagdaraanan, at malalim ang sakit ng mga salitang natanggap mo mula sa iyong mister at sa kanyang pamilya. Sa ganitong sitwasyon, natural lang na makaramdam ng lungkot, galit at pagkalito. Huwag mong isisi sa sarili mo ang lahat ng nangyayari. Tandaan mo na ang pagkakaroon ng anak ay hindi lamang nakasalalay sa iisang tao, kundi isang proseso na maraming maaaring makaapekto, gaya ng kalusugan, lifestyle, at ibang aspeto ng pangangatawan at pangkaisipan ng mag-asawa.

Mahalaga sana na maging bukas kayong mag-asawa sa posibilidad na magpatingin sa doktor para malaman kung ano ba ang kalagayan ng inyong kalusugan sa larangan ng pagkakaroon ng anak. Ang medical check-up ay makakatulong para magkaalaman kung ano talaga ang dahilan ng inyong sitwasyon, at hindi ito tungkol sa pagtuturo ng may sala, kundi pagtutulungan. 

Maaaring mahirap kumbinsihin ang iyong asawa na magpatingin, pero baka makatulong kung maipapakita mo sa kanya ang benepisyo ng pagkakaroon ng tamang impormasyon mula sa mga eksperto. 

Ang suporta mula sa kanya ay napakaimportante, at nararapat lang na samahan ka niya sa prosesong ito.

Makakatulong din na maghanap ka ng mga taong handang makinig at umunawa sa iyong sitwasyon—mga kaibigan o kamag-anak na maaaring makatulong sa pagbibigay ng suporta at lakas ng loob.

Mahalaga rin ang pag-alaga sa sarili mo. Anuman ang maging desisyon ng asawa mo, tandaan mong may sariling halaga at kakayahan ka.

DR. LOVE