Nubain ug marijuana nakuha gikan sa 3 ka tawo

CEBU, Philippines – Lalaki nga mosakay unta og barko paingon sa Dakbayan sa Tagbilaran, Lalawigan sa Bohol, nagtingkagol na hinoon sa prisohan dihang nasakpan nga adunay dalang kontrabando niadtong Biyernes sa gabii.

Ang nasikop sa may Pier 2 sa Siyudad sa Sugbo mao si Jose Katalbas, 49-anyos, taga Upper Katipunan St., Mansasa District, Tagbilaran City.

Nasigpatan si Katalbas nga kadudahan og lihok hinungdan nga gisita kini sa mga sakop ni Police Senior Inspector Vincent Castrodes  dihang wala kini moagi sa boarding area sa mga pasahero.

Sa dihang girekisa kini sa mga polis, nakit-an sa iyang medyas ang 79 ka ampules sa nubain hinungdan nga siya gisikop.

Ang dinakpan tak-om sa dihang gikuhaan og pamahayag.

Samtang duha ka batan-on ang nasikop dihang nasakpan sa akto sa mga nag-roving nga polis nga gagamit og marijuana sa may Tingko Beach sa Barangay Daanlungsod sa Lungsod sa Alcoy niadtong Biyernes sa udto.

Ang mga dinakpan mao sila si Christian Andrew Yuan Llanita, 18-anyos ug Hansel Garcia Camello, 19-anyos nga parehong molupyo sa Barangay Nangka sa Lungsod sa Consolacion.

Si PInsp. Ramuel Banogon ug ang iyang mga kaubanan nakadawat og taho gikan sa usa ka lalaki nga naninda sa dapit nga ang maong mga suspek gagamit og marijuana.

Daling gisusi sa kapolisan ang maong taho ug ilang nasakpan sa akto si Llanita nga adunay dalang nilikit nga dahon sa lomboy ug marijuana. Samtang si Camello nasakpan usab nga adunay gidala nga usa ka plastik nga may sulod nga dahon sa marijuana nga mobalor og P200.

Kasamtangang anaa sa buhatan sa kapolisan sa Lungsod sa Alcoy ang duha ug gikatakdang pasakaan og kaso. (Erly Ann Alcontin, CNU Intern/DILT)(BANAT NEWS)