Youth Camp pasiugdahan sa PSWDO ug PopCom
CEBU, Philippines – Ang Kapitolyo pinaagi sa Provincial Social Welfare and Development Office kon PSWDO, mipahibawo nga ipahigayon ang 3rd Annual Youth Camp karong umaabot Mayo 16-18 sa Alta Resort nga nahimutang sa Lungsod sa Cordova.
Gilauman nga mahimong tema sa maong kalihokan mao ang "Ako Mahimo: A Campaign Against Teenage Pregnancy and HIV/AIDS."
Gitumong ang maong tema aron sa pagpataas sa kahibawo kabahin sa pagpugong sa teenage pregnancy, human immuno deficiency (HIV) ug acquired immune deficiency syndrome kon AIDS ngadto sa mga kabatan-onan.
Nasayran nga nagkabata ang mga nagpositibo sa HIV diin matud sa datus gikan sa Department of Health (DOH)-7, mitala ang Probinsya sa Sugbo og 3, 665 HIV cases sukad sa tuig 1984 hangtod sa tuig 2017.
Sigon pa ni Ma. Luzely Rufo, PSWDO Population Program Officer, nga di moubos sa 150 ka mga batan-on ang moapil sa naasoy nga summer youth camp diin mag-edad kini gikan sa 15 ngadto sa 19-anyos.
Hisgutan unya sa mga batan-on ang mga nagkadaiyang advocacy programs nga ila usab ipatuman sa ilang kabarangayan.
Lakip sa nag-organisar sa maong kalihukan mao ang Population Commission kon PopCom diin pinaagi sa maong aktibidad, mahatagan og kahigayonan ang mga partisipante nga mapaambit ang ilang mga kaalam ngadto sa uban pang kabatan-onan. (Caren Abing, CNU Interns/DILT)(BANAT NEWS)
- Latest
