Hubog nanunggab og batan-on
CEBU, Philippines – Hubog nga 56-anyos, gisikop sa kapolisan sa Lungsod sa San Fernando human kini manunggab og menor de edad sa Barangay Sangat sa naasoy nga lungsod. Ang gisikop mao si Parolito Tangub, minyo ug residente sa maong lugar. Samtang ang biktima mao ang 14-anyos nga lumulopyo ra usab sa dapit.
Matud pa sa saksi nga si Alvin Segovia, hubog ang suspek nga miduol sa ilang gitambayan sa biktima ug nangita kini og ka engkwentro hinungdan nga wala nila kini hatagi og pagtagad rason nga nihawa ra usab kini. Apan wala nila mabantayi nga mibalik diay ang suspek ug aduna na kini dala nga kutsilyo ug kalit nga midunggab sa likod nga bahin sa lawas sa ilang kauban nga menor de edad.
Anaa na sa ospital ang biktima ug kasamtangang gitambalan. Samtang ang suspek, nagtingkagol na sa prisohan ug gipaabot nga mapasakaan og tukma nga kaso. (/DILT)(BANAT NEWS)
- Latest
