Kapin 5,000 mitambong sa paglusad sa Biyaya ng Pagbabago

CEBU, Philippines – Sobra sa 5,000  ka tawo ang mitambong sa paglusad sa Biyaya ng Pagbabago o anti-poverty alleviation program sa administrasyon ni Presidente Rodrigo Duterte kagahapon nga gipahigayon diha sa Cebu Technological University (CTU).

Matud sa hepe sa registration committee Alma Rusiana nga miabot ngadto sa 5,300 ka tawo ang nagparehistro ug 5,200 niini ang nitambong.

Ang mga labing daghan nga delegado nga mitambong naggikan sa dakbayan sa Lapu-Lapu nga miabot ngadto sa 2,300 ug ikaduha ang Cebu City south district nga dunay 1,010, Cebu City north district nga adunay 1,000 ug ang uban naggikan sa ubang mga lugar sa probinsiya sa Sugbo.

Si Romy Cal, district head coordinator sa Cebu City south district mibutyag nga dako ilang pasalamat sa Kilusang Pagbabago tungod kay gihatagan sila niini og P18 milyones nga pundo nga gipatukod nila sa multi-purpose covered court building diha sa Barangay Bangkal, dakbayan sa Lapu-Lapu.

Subay niini, si Undersecretary Joselito “Penpen” Libres sa Office of the Participatory Governance(OPG) nagkanayon nga ang  Biyaya ng Pagbabago usa ka Poverty Alleviation Program sa administrasyon ni Duterte nga gipatuman sa opisina ni Cabinet Secretary Leoncio Evasco Jr. ug ang lead implementing unit niini mao ang OPG. Tinguha sa maong programa nga makatabang pagpakunhod sa kakabus sa nasud gikan sa 21 porsyento ngadto sa 14 porsyento ug aron mahaw-as sa kalisud ang target nga kapin sa 6 milyones ka mga kabus nga mga Pilipino.

Midugang si Libres nga ang operational strategy niini mao ang serbisyo sa gobiyerno makaabot gyud ngadto sa katawhan diin ang mga nagkalain-laing ahensiya magtinabangay aron ang maong mga kabus matabangan.

Si Assistant Secretary for Project Performance Management Office Jonas Soriano miasoy kagahapon nga ang 23 ka ahensiya sa gobiyerno naghatag og mga programa ug mipasabot sa ilang mga gihimo.

Ang  mga ahensiya nga nalambigit sa maong kalihukan gilangkuban sa Department of Agriculture (DA); Bureau of Fisheries & Aquatic Resources (BFAR); Department of Environment and Natural Resources (DENR); Department of Agrarian Reform (DAR); Department of Labor and Employment (DOLE); Philippine Statistics Authority (PSA); Department of Interior and Local Government (DILG); Philippine Coconut Authority (PCA); Department of Trade and Industry (DTI); Cooperative Development Authority (CDA); National Food Authority (NFA); Philippine Information Agency (PIA); Department of Health (DOH);  Department of Social Welfare and Development (DSWD); Social Security System (SSS); TESDA ug  Housing agencies. (Mary Rose S. Sagarino ug Niña Mae P. Salvacion, CNU Interns/BDB)(BANAT NEWS)