Anak sa namatay nga sundalo hatagan og scholarship

CEBU, Philippines – Gipadayag kagahapon ni Senador Sonny Angara ang mga bag-ong gisugyot nga balaod alang sa mga benepisyo sa pamilya sa mga sundalong namatay atol sa gubat.

Ang maong pagpadayag atol kini sa paghatag og mensahe ni Angara alang sa Unified Command sa Philippine Army, Philippine Air Force ug Philippine Navy sa iyang pagbisita kagahapon diha sa Central Command (CentCom) sa Camp Lapu-Lapu, Barangay Apas, dakbayan sa Sugbo

Usa sa mga gitataw ni Angara mao ang gi-adopt sa senado nga joint resolution #1 series of 2018 niadtong Disyembre sa miaging tuig mahitungod sa pagtaas sa sweldo sa military ug mga uniform personnel o MMT sa gobiyerno.

Lakip na niini ang military personnel ubos sa Department of National Defense ug sa DILG, Philippine Coast Guard ug National Mapping and Resource Information Authority (NAMRIA).

Adunay mga gisugyot nga balaod sama sa Uniform and Law Enforcement Personnel Special Financial Assistance Act ug Uniform and Law Enforcement  Personnel Education Assistance Act diin adunay scholarship ang anak sa mga mamatay nga sundalo atol sa  gubat.

Lakip niini ang tuition, miscellaneous fee, libro, transportation, pagkaon ug mga gamit sa eskwelahan sa pag-eskwela niini og kinder hangtod sa kolehiyo.

Nunot niini, gihisgutan usab niya ang nasinati sa kasundalohan ngadto sa Marawi diin daghan ang namatay ug nangaangol. (CNU Intern/BDB)(BANAT NEWS)