1 patay, 13 sugatan sa aksidente sa TPLEX

MANILA, Philippines — Nasawi ang isang ginang na 22-anyos habang 13 iba pa ang nasugatan makaraang aksidenteng sumalpok sa bakal na barandilya ang sinasakyan nilang van sa kahabaan ng Tarlac-Pangasinan –La Union Expressway (TPLEX) sa bayan ng Rosales, Pangasinan nitong Sabado ng madaling araw.

Kinilala ang nasawing biktima na si Shilany Aten-an, taga-Buguias, Benguet, binawian ng buhay habang isinusugod sa pagamutan.

 Patuloy namang nilalapatan ng lunas sa pagamutan ang mga nasugatang biktima na isinugod dito ng mga rescuers.

Sa ulat ng Pangasinan Police, nangyari ang sakuna sa bahagi ng nasabing highway bandang alas-12:30 ng madaling araw.

Nabatid na masyadong mabilis ang takbo ng van na minamaneho ni Luisito Mora, 44 taong gulang nang biglang pumutok ang gulong nito bunsod upang sumalpok ito sa barandil­yang bakal sa bahagi ng highway.

Nahaharap naman sa kasong homicide at multiple injuries ang driver ng van bunga ng insidente.