Manimahong karnero

ABRIL 22, 2018: Ikaupat nga Domingo sa Pasko sa Pagkabanhaw

WORLD DAY OF PRAYER FOR VOCATIONS

Mga Pagbasa: Buh. 4;8-12/Sal. 118/1 Jn. 3;1-2/Jn. 10;11-18

Kini ang hagit ni Papa Francisco sa mga kaparian nga nahimong mga magbalantay. Nga unta mamahimo silang usa sa ilang mga karnero ug nahimong kabahin sa mga karnero. Kini ang hinungdan nga mahinungdanon gyud kaayo unta ang immersion uban sa katawhan kay after all ang pastoral work nagpasabot man og ministry of accompaniment ni bisan kinsa nga gialagaran. Apan subo kaayo palandungon nga tungod sa makutas nga panlimbasog sa pag-ebanghelyo daghan na lang karon ang buot magpabilin diha sa mabugnaw nga mga lawak sa kumbento ug nahimong sakramental na lang kaayo ang tanan. Hinuon dili ikalimod nga gumikan sa nagkakunhod nga gidaghanon sa moalagad nahimong daw sa paghot sa buwan ang ideyalismo. Apan dili kini mahitungod lang sa tinguha nga mahimong relevant bisan pa man sa dakong purohan nga mahimong obsolete ning kalibutan. Si Papa Francisco nahimong inila tungod kay siya maantigong mohatag og panahon ug maantigong mopabati kun unsa diay ka importante ang tawo nga hinimo ingon ug sama sa dagway sa Dios ang matuod nga magbalantay natong tanan.