Laing Pinoy world boxing champion misulbong

CEBU, Philippines – Duna na sa’y laing ikapasigarbo ang mga Pinoy sa bantawan sa boksing.

Kini human si Michael Dasmarinas mipakamang sa Pransiyano niining kontra nga si Karim Guerfi sud lamang sa pipila ka segundos nga nakaon sa ikaupat nga hugna aron pagsakmit sa bakanteng  International Boxing Organization bantamweight title niadtong Sabado sa gabii didto sa Singapore Indoor  Stadium.

Si Dasmarinas mibuhi og makabungog nga left hook ngadto sa apapangig nga maoy nakapahagba  ni Guerfi sa hingpit. Dali nga gitabang sa mga medics sa Guerfi uban ang usa ka stretcher. 

Misuway og bangon si Guerfi, apan mibarag ra sab dayon kini. Nakabarog ra hinuon si Guerfi ug  nakalakaw sa iyang kaugalingon.

Wala kapugngi sa 25-anyos nga si Dasmarinas ang pagtulo sa luha sa kalipay human giisa ang 

iyang mga kamot alang sa ika-28 niyang daog nga gidayan-dayanan na karon og 19KOs.

Si Dasmarinas usa sa duha lamang ka mga Pinoy nga naghari karon isip world champion.

Ang laing usa mao si IBF super flyweight champion Jerwin Ancajas.

Karong adlawa, turno na sab ni Nonito ‘The Filipino Flash’ Donaire Jr. nga motunol og dungog sa  nasud sa dihang iyang sangkaon si Carl Frampton alang sa bakanteng WBO interim featherweight title didto sa SSE Arena sa Belfast, Northern Ireland.