Pagdili sa mga dinastiya
Karong napupos nang lugway sa pagpasaka sa certificates of candidacy (CoCs) sa mga managan sa piniliay sa barangay ug Sangguniang Kabataan (SK) sunod buwan, magsugod dayon ang kutas nga gimbuhaton sa Commission on Elections (Comelec): Ilang hukngayon ang CoCs aron nga mapagawas na ang opisyal nga listahan sa mga kandidato ug kandidata duha ka semana gikan karon.
Matod ni Atty. Anna Fleur Gujilde, ang bag-ong Cebu City South District Election Officer, ipada dayon sa mga buhatan sa Comelec ang tanang nadawat nga CoCs ngadto sa Law Department sa ilang ulohang buhatan.
***
Nitug-an si Gujilde sa dyAB Radyo Patrol nga tabangan nila ang Law Department pinaagi sa pagsusi kon ang mga nipasaka sa CoCs narehistro ba isip mga botante sa mga barangay nga ilang daganan. Kon wa marehistro laktod nga mabasura ang ilang kandidatura.
Sa ubang posibleng babag sa mga kandidatura, atimanon sa Comelec ang mga protesta nga ipasaka sa kaatbang nga mga politiko, kinsa gipaabot nga mas kutikutihan nga mosusi sa kasaypanan sa CoCs. Tukiunon pa hinuon ang katakos sa Law Department paghusay sa tanang protesta sud lang sa duha ka semana.
***
Kasagaran sa kalibog sa mga managan ug mga botante nasentro sa mga lagda sa piniliay sa SK nga sa labing unang higayon naglakip sa pagdili sa politikanhong dinastiya:
•Makadagan ba og dungan ang managsuon nga wa pay gihuptang katungdanan bisan kon makalapas na sila sa lagda kon pulos makadaog sa piniliay sa Mayo 14; ug
•Mapatuman bang pagdili sa pagdagan sa batan-ong kapuyo sa pinili nga opisyal nga wa tuod makasal apan nabantang sa publiko ang ilang panag-ipon?
***
Nipasabot si Gujilde nga kay labing una man kining piniliay nga mapahigayon ubos sa SK Reform Act, gipaabot nang daan ang pagtumaw sa bag-ong mga kontrobersiya tungod sa mga komplikasyon nga mahimong wa lang malantawi sa mga senador ug mga kongresista.
Ang makasaysayanon nga paglusot sa probisyon batok sa pagdagan sa mga paryente sa dugo ug panagtiayon nahimong mas talagsaon kay ang mga nagpasiugda pulos mga sakop sa labing gamhanang politikanhong mga dinastiya sa nasud: Silang kanhi Senador Bongbong Marcos, Senador Bam Aquino, Senador JV Ejercito, ug Senador Nancy Binay.
- Latest
