Naga nigamit na og solar system
CEBU, Philippines – Pormal na nga gigamit sa Siyudad sa Naga ang solar panel diin makadaginot ingon man maayo sa kalikupan ang paggamit og enerhiya o kuryente.
Ang Siyudad sa Naga pinangulohan ni Mayor Kristine Vannessa Chiong nakig-alayon sa PNOC Renewables Company.
Matud ni Chiong nga nagtaud sa solar panel ang PNOC nga libre nga wala’y gasto ang siyudad.
Ang City Hall sa Naga mokuha og 300 kilowatts matag adlaw gikan sa Visayan Electric Company (VECO) sa kantidad nga P10 per kilowatt.
Apan kay naa naman ang solar panel hayan sila ang moserbisyo sa City Hall nga mohatag og 100 kilowatts matag adlaw nga kantidad og P9 matag kilowatt samtang ang 200 kilowatts ipadayon gihapon sa VECO.
Si Chiong niingon nga sulod sa 15 ka tuig nga ang PNOC maoy modumala niini hangtud nga itugyan na kini ngadto sa siyudad nga wala na’y bayranan.
Ang solar panel nga gihimo sa Siyudad sa Naga mao ang labing una sa nasud sa mga local government units. (/GMR)(BANAT NEWS)
- Latest
