12 minors, 30 ka tawo nasikop
CEBU, Philippines – Nadakpan sa sulod sa drug den ang 12 ka mga minors ug 30 ka tawong mga gidudahang drug pushers sa managlahing buy bust operations sa kapolisan sa Metro Cebu.
Si Senior Police Officer 3 Leoven Sebomit sa Consolacion Police Station miingon nga gilusad ang sagunson nga anti- drug operation diha sa barangay Danlag, Nangka, Poblacion ug Cansaga.
Nadakpan sila si Oscar Diacor, 29, Noel John Basubas, 23, ug Eugelito Valle, 22, ug 12 ka mga minor de edad nga diha sa mga drug dens ang ilang naabtan. Nasakmit gikan nila ang 24 ka gagmay nga paketeng shabu. Ang maong mga minors gitugyan ngadto sa municipal social worker.
Sa Oplan Limpiyo sa Danao City Police Station, nasakmit sa kapolisan ang mokabat sa 55. 5 gramos nga shabu nga mokantidad og P645 mil ug nasikop ang 23 ka mga gidudahang tigpayuhot niini gikan sa barangay Poblacion, Looc ug Tuburan Sur.
Sa Cebu City, upat ang nadakpan gikan sa managlahing operasyon kontra drugas diha sa barangay Sambag Uno ug Duljo-Fatima kagahapon sa kaadlawon ug buntag.
Didto sa barangay Sambag Uno, nadakpan silang Edwin Go, 59, ug Erwin Go, 36, sa mga sakop sa Philippine Drug Enforcement Agency-7 human gisumbong sa usa ka concerned citizen ang ilang operasyon.
Nakuha gikan sa duha ang 22 ka mga pakete sa gidudahang shabu nga adunay gibug-atong 50 ka gramo nga gibana-banang P250 mil ang kantidad.
Sa barangay Duljo Fatima, gironda sa Drug Enforcement Unit sa Cebu City Police Office ang usa ka Jessie Carl Butalid alyas Siboy ,22, diha sa Sitio Seaside apan nakaikyas kini. Si Butalid giingong kanhi bata-bata sa napatay nga drug lord nga si Jeffrey “Jaguar” Diaz. Nakuha gihapon sa mga operatiba ang walo ka mga gagmay ug usa ka medium nga paketeng gituohang shabu nga 5.48 ka gramos.
Sa laing operasyon diha sa N. Bacalso Avenue sa mao gihapong barangay nadakpan silang James Karl Sacedon alyas Jake, 20 ug Noel Oltiano alyas Dungkoy, 45. Nakuha gikan kang Sacedon ang usa ka medium nga pakete sa gituohang shabu samtang gikan kang Oltiano ang usa ka dakong pakete sa gidudahang shabu nga mokantidad tanan og P365,800.
Sa Talisay City, usa ka John Paul Daan, 23, ang nadakpan sa kapolisan diha sa Sitio Kabanayan, barangay Bulacao human nakuhaan og medium size pack nga drugas. Ang grupo ni Supt. Mario Conag, mihimo sa operasyon human nakadawat og daghang reklamo batok sa suspek. (Camille Pateres, Rowena Capistrano, Gabriel Bonjo ug Kathleen Kaye G. Gonzaga, CNU Intern/IBM)(BANAT NEWS)
- Latest
