“Endo”

Dili na idayon ni Presidente Rodrigo Duterte ang pagpirma og usa ka Executive Order nga magtapus na sa gitawag nga “Endo,” kun contractualization sa mga mamumuo.

Mora’g masagmuyo gyud kaayo niini ang mga mamumuo nga nagpaabot nga aduna sila’y nindot nga balita atol sa pagsaulog sa Labor Day karong Mayo 1.

Sayo pa, si Presidential spokesman Harry Roque maoy mipahibalo nga si Duterte maoy gusto nga madali ang pagpagawas sa maong executive order.

Ang saad ni Duterte pagpagawas og kamandoan nga magdili na sa contractualization, apil sa iyang mga panaad sa nangampanya pa siya pagka presidente niadtong 2016.

Kining “endo,” gi-apply sa mga employer aron paglikay nga ma-regular ang mga trabahante nga kutob lang sa lima ka buwan ang pagtrabaho. Hinoon, mibutho ang isyu nga ang draft EO dili kuno makahingpit pagtapus sa “endo,” tungod kay matud pa nagkinahanglan kini’g legislation ug mag-amendar sa Labor Code.

* * *

Matud ni Senador Bam Aquino nga ang pagpalagpot ni Secretary Leoncio Evasco, Jr. gikan sa NFA Council, “is a step backward in battle vs. corruption.” Kini tungod kay walay nakitang kahugawan batok ni Evasco.

Sa iyang bahin, si Senador Francis Pangilinan namahayag nga kining nahitabo ni Evasco, si NFA Administrator Jason Aquino, “is the clear winner while the consumers are the losers.”

Si Pangilinan nga kanhi nangulo sa NFA Council, nangutana ngano nga ang tawo nga adunay limpyo nga track record maoy gipalagpot?

* * *

Niay nindot nga kaugmaran nga si Mayor Tomas Osmeña dili mosupak sa LRT project, kaylagi, makaayo sa katawhan, apan, iyang ipadayon ang BRT tungod kay makaayo man usab sa katawhan. Tan-aw nako, mas dali pa nga buhaton ang BRT kay sa gilaraw nga LRT nga dangtan pa tingali’g upat ngadto sa lima ka tuig nga atong kapahimuslan.

Ang BRT na-aprobahan na sa mga concerned government agencies ug aduna na kini bilateral agreement uban sa World Bank alang sa galastoan niini.

Politika! Ang English dictionary naghatag og kahulogan sa pulong politics: “science of government; political affairs or methods.” Sa ato pa, dili daotan ang politika, per se. Dili unta ni gamiton pagbabag sa mga proyekto sa kaatbang sa politika.

* * *

Niining kaguliyang karon sa labaw’ng hukmanan, adunay pangutana kon ang atong Supreme Court magpabilin ba nga “Supreme” ug pagka-equal branch sa pagpangagamhanan?

Ato ning huwaton nga kaugmaran.