Sidewalk sa 1st district unahon paghawan

CEBU, Philippines – Nagtagbo kagahapon sa buntag sa buhatan sa Department of Public Works and Highways-7 ang mga representante sa local government units, kapolisan, stakeholders sa unang distrito sa Probinsya sa Sugbo, traffic czar sa probinsya ug regional director sa DPWH aron tukion ang pagsulbad sa   trapiko.

Matud ni DPWH-7 Director Ador Canlas nga pinaagi sa initiative sa kagamhanan sa Probinsya sa Sugbo alang sa pagsulbad sa problema sa traffic, nipatawag sila og inisyal nga tigum.

Sumala pa ni Canlas nga daghan pa nga nitumaw nga sugyot ug nahukman nila nga mohimo og hiniusa nga paghawan sa tanang road-right-of-way sama sa illegal parking, illegal vendors ug tanan nag-ali nga nakahatag og grabeng traffic.

Magpatawag pa og laing tigum ang grupo aron madesisyunan nila kung kanus-a ipatuman ang paglimpyo sa mga sidewalk gikan sa mga ali.

Ang traffic czar sa probinsiya, Jonathan Tumulak, nitug-an nga una nilang gitutukan ang unang distrito tungod kay mao kini ang problemado sa traffic sa habagatang bahin sa Metro Cebu ug isunod nila ang amihanang bahin.

Gitug-an ni Tumalak nga ang DPWH maoy mopadala og notisya sulod sa tulo ka higayon sa malapason una himoon ang clearing operation.  Awhag ni Tumulak niadtong adunay illegal structures sa sidewalk, illegal parking, carwash ug vulcanizing nga biyaan na lang nila o kaha gub-on na ug dili na lang magpaabot sa ilang team. (/GMR)(BANAT NEWS)