Babaye napasok sa bus kritikal
CEBU, Philippines – Kritikal ang kahimtang sa usa ka babaye human nadasmagan ug napasok sa Ceres bus sa South Road Properties (SRP) sa habig sa San Isidro, Dakbayan sa Talisay kagahapon sa buntag.
Ang biktima mao si Analyn Avanzado, 26, taga Barangay Cansojong sa maong siyudad, samtang ang nakaigo sa biktima nga Wigo Toyota nga sakyanan gimaneho ni Kevin Ray Tabada, 25, taga Barangay Biasong sa maong siyudad.
Si PO3 Marvin Papellero sa Talisay City Traffic Division niingon nga nilabang ang biktima samtang naghunong ang Ceres bus nga gimaneho ni Roselo Agravio, 40-anyos. Nagdagan ang sakyanan ni Tabada hinungdan nga nakalitan siya sa kalit nga paglabang sa biktima ug naigo kini ug nalagpot ug napasok ilawom sa bus.
Matud ni Papellero nga head injury ang naangkon sa biktima nga gidala sa tambalanan sa Siyudad sa Sugbo.
Gidakop si Tabada samtang si Agravio ang gibuhian ra kay wala man gyud kini naigo sa Ceres bus.
Dugang pa ni Papellero nga delikado kun nalatayan gyud ang biktima. (/GMR)(BANAT NEWS)
- Latest
