Wala’y motapon sa BOPK

CEBU, Philippines – Pipila sa angayan nga atangan sa umaabot nga Barangay ug Sangguniang Kabataan (SK) Election kon duna ba’y mga barangay official ang motapon gikan sa ilang orihinal nga grupo ngadto sa laing grupo.

Sayo pa, si Cebu City Mayor Tomas Osmeña nagkanayon nga dunay mga barangay official sa oposisyon ang giingong mipadayag sa ilang tinguha nga mobalhin sa Bando Osmeña Pundok Kauswagan (BOPK).

Apan si Vice Mayor Edgardo Labella sa oposisyon mihimakak sa maong pangangkon ni Osmeña ug nagkanayon kini nga wala siya’y nakita bisan usa nga kaalyado nila nga mga barangay official nga ilang gidudahan nga motapon sa BOPK.

Matud ni Labella nga nagkadaghan ang ilang pundok karon ug giingong naglibog na sila kay ang ilang mga kandidato pagka-kapitan naghinobra.

Sigon ni Labella nga dunay mga barangay official nga miapil sa ilang adbokasiya pakigbatok sa ilegal nga drugas, kurapsiyon sa gobiyerno ug daghan nila ang mipadayag nga wala sila nalambigit sa narco-politics ug dili usab gyud sila malambigit niini.

Sa pagkakaron moabot ngadto sa 65 ka barangay ang kaalyado sa oposisyon ug matud ni Labella  nga napanglantawan nila nga madugangan pa ang maong gidaghanon.

Kahinumduman si Osmeña mipadayag sa iyang tinguha nga makuha ang mayoriya sa konseho apan si Labella miingon majority man o dili ang ilang grupo mohimo lang gihapon sila sa ilang trabaho subay na sa ilang mandato ug dili sila mahimong obstructionist.

Samtang si Osmeña sa iyang bahin, miingon nga sa katapusan ang katawhan lang gihapon ang modesidir kon kinsa ang ilang gustong mahimong lider. (/BDB)(BANAT NEWS)