Raptors, Celtics, Pelicans 2-0 na

CEBU, Philippines – Gipilde na sab sa Toronto Raptors, Boston Celtics ug New Orleans Pelicans ang tagsa-tagsa nila ka mga karibal aron pagposte og 2-0 nga bentaha sa NBA first-round playoff series kagahapon.

Si DeMar DeRozan mikadlit og 37 puntos uban ang lima ka rebounds ug upat ka assists sa dihang gihimulbolan sa Raptors ang bisitang Washington Wizards sa iskor nga 130-119.

Gikan sa pagsugod sa duwa, mibugwak dayon og nagkayong opensiba ang Raptors hinungdan nga ilang gilubong og 18 puntos ang Wizards sa halftime, 76-58.

Mao kadto ang labing daghan nga puntos sud sa first half sa kasaysayan sa prangkisa sa Toronto.

Si Jonas Valanciunas dunay 19 puntos ug si C.J. Miles mitali og 18 alang sa Toronto nga manulong sa Washington alang sa Game 3 karong Sabado.

Didto sa Boston, padayong hamugaway ang paglawig sa Celtics bisan pa man og gihamok sila sa injury human ila na sab nga gitumba ang Milwaukee Bucks, 120-106.

Si Jaylen Brown maoy miabaga sa opensiba sa Celtics uban ang 30 puntos sud sa 33 minutos niyang pagduwa sa korte.

Mitampo si Terry Rozier og 23 puntos ug walo ka assists alang sa Celtics nga pipila ka higayon naglabaw og double figures nga ilang namintinar hangtod sa katapusang segundo sa aksiyon.

Sa bugno didto sa Portland, ang New Orleans Pelicans padayon nga mibuak sa dughan sa hometown fans human ila na sab nga gipatiurok ang TrailBlazers, 111-102 ug nagkinahanglan na lang og duha ka daog   aron moabante sa second round.

Si Jrue Holiday maoy bida sa Pelicans human mipatuasik og 33 puntos, samtang si Anthony Davis mibahog og 22 puntos.