Damgong natuman
CEBU, Philippines – Human sa 23 ka tuig nga pagpaabot, ang JRG Gullas Tennis Cup nahimo na gyud nga usa ka Group 1 event ubos sa Unified Tennis Philippines (UTP), usa ka bag-ong kahugpongan kansang tumong mao ang pagbaid sa abilidad sa mga atleta ug ingon man pagpalambo sa tennis sa nasud.
Sud sa pipila ka mga katuigan, wala gyud matubag ang pangutana kun kanus-a mahimong Group 1 event ang Gullas Cup nga giisip nga labing dugay ug labing dako nga junior tennis tournament gawas sa Metro Manila.
Natubag na kini kagahapong adlawa.
Mismo ang nagporma sa maong event, si Cebu Sports Hall of Famer Jose ‘Dodong’ R. Gullas ang mipahibawo sa maayong balita atol sa usa ka press conference sa iyang buhatan sa University of the Visayas (UV) diin siya naglingkod isip Executive Vice President.
“I am the happiest man after being informed by Mr. John Pages that our tournament, after 23 years, is now a Group 1 event,” matud pa ni Gullas.
Iyang gipasabot mao si sportsman John Owen Z. Pages nga mitabang kaniya pagmugna sa Gullas Cup uban sa iyang anak nga si John Vicente ‘Johnvic’ Gullas niadtong tuig 1995.
Wala sa’y kasudlan sa iyang kalipay si Johnvic Gullas ning maayong nga kalamboan.
“For how many years, that’s what we’ve really been aiming for. I’m glad that we are able to achieve it at last,” sumala pa ni Johnvic Gullas.
Gipasabot ni Pages nga ang Gullas Cup usa lamang sa lima ka Group 1 tennis events ubos sa poder sa UTP dinhi saVis-Min region. Ang laing upat gibahin sa Cebuana Lhuillier ug Palawan Pawnshop.
Isip Group 1 event, si Pages nagkanayon nga ang mga mananaog nga mga magduduwa makakuha sa labing taas nga puntos nga ilang gikinahanglan alang sa ilang rankings.
Nunot niini, si Pages naglantaw nga mosamot og kadaghan ang moapil sa 23rd JRG Gullas Cup nga gikatakda karong Hunyo 1-5 diha sa CitiGreen Tennis Resort sa Barangay Punta Princesa ug sa Alta Vista Golf and Country Club sa Barangay Pardo.
Target ni Pages nga makahakot sila og dul-an 300 ka mga entrante sa lima ka adlaw nga torneyo nga naglangkob og siyam ka mga kategoriya – mixed 10-under ug boys/girls 12, 14, 16 ug 18-under.
- Latest
