Lue dunay hagit ni Lebron
CEBU, Philippines - Ang coach sa Cleveland Cavaliers nga si Tyronn Lue nagkanayon nga gusto siyang makakita og usa ka mas agresibong LeBron James human sila gilampurnas sa Indiana Pacers pagsikad sa NBA playoffs didto mismo sa ilang tugkaran.
Naka-’triple double’ man tuod si James sa 98-80 nga pagbalbal kanila sa Pacers, apan ang four-time NBA Most Valuable Player nagpabugnaw usa sa nag-unang 10 minutos sa duwa sa wala pa molabay sa labing una niyang itsa ug niadtong higayona ang Pacers naglabaw na og tagaliog, 25-8.
Ang maong kapildihan maoy labing una ni James sa usa ka first-round NBA playoff series sukad niadtong 2012 sa dihang ang iyang Miami Heat gipatiurok sa New York Knicks.
Matud pa ni Lue nga kinahanglan dili na kini mahitabo pag-usab ni James sa Game 2 karong Huwebes. Gusto niya nga ang iyang alas moduwa nga mas agresibo ug mopasilaob dayon sa ilang opensiba pagsugod sa duwa.
Isip lider ug kapitan sa ilang koponan, buot ni Lue nga si James mangita og paagi aron dasigon ang iyang mga kauban.
- Latest
