8 police stations gigantihan sa CPADAO

CEBU, Philippines — Gigantihan og salapi sa Cebu Provincial Anti-Drug Abuse Office ang walo ka police stations sa Probinsiya sa Sugbo sa malampusong operasyon batok sa ginadiling drugas niadtong 2016.

Ang walo mao ang police stations sa San Remigio, Dakbayan sa Danao, Balamban, Pinamungajan, Dakbayan sa Naga, San Fernando, Samboan ug Ginatilan.

Ang Danao City Police Station ang adunay labing daghang gramos  sa shabu nga nakompiska nga niabot sa 211.6 ka gramos gikan sa 12 ka personalidad sa ilang drug watch list.

Ang labing gamay nga nakuha mao ang Samboan PS diin duna lay 0.06 ka gramos gikan sa duha ka personalidad sa ilang drug watch list.

Ang pangulo sa CPADAO nga si Carmen Remedios Durano-Meca niingon nga nagbase sila sa Operation Law Men sa Dangerous Drugs Board diin ang matag gramo sa shabu heroin ug ketamine adunay ganti nga P1,000 matag gramo ug tag P100 matag gramo kung molapas na niini. Ang shabu kinahanglang maggikan sa mga personalidad nga anaa sa ilang drug watch list.

Matud ni Meca nga ang tanan niabot og P630 mil sa walo ka estasyonan ang ilang gihatag direkta ngadto sa mga operatiba ug sa hepe niini.

Ang Operation Law Men giaprobahan sa DDB niadtong Agosto 2016 apan karon lang kini nahatag sa gobiyerno sanglit matud pa nga daghan pa kining giagian nga opisina aron legal nga makapagawas og kwarta.

Ang direktor sa Cebu Provincial Police Office, Senior Supt. Edgar Alan Okubo, niingon nga daku kining tabang sa pagpasaka sa morale sa kapolisan sa pagpakigbatok sa drugas.

Samtang ang kaniadtong hepe sa kapolisan sa Dakbayan sa Danao nga si Chief Insp. Gerard Ace Pelare nipadayag nga ang maong ganti usa lang ka bonus sa ilang pagpanerbisyo.

Si Meca nibutyag nga kasamtangan pang gilihok ang ikaduha nga batch diin magbase sila sa tibuok tuig 2017. Siya nidugang nga aduna pay dakung kahigayunan nga maapil ang laing mga estasyonan sa tibuok Probinsiya sa Sugbo sa maong ganti. (BANAT NEWS)