Katabang gikawatan sa kanhi kapuyo

CEBU, Philippines — Mokabat sa P34,850 nga balor sa alahas ug construction materials ang gikawat sa Barangay Banhigan, Dalaguete niadtong Sabado sa buntag.

Ang biktima nga si Inocencia Dicdican Besin, 52, nagpuyo sa naasoy nga dapit ug nagtrabaho sa Lower Calvary, Barangay Apas, Dakbayan sa Sugbo isip usa ka housekeeper ang nakawatan sa maong mga butang sa iyang panimalay.

Ang mga suspek mao sila si Dionisio Monceda, 38, ug anak nga si Marciano Monceda, 28, ug laing mag-amahan nga sila si Nestor Martinez Sr., ug anak nga si Nestor Martinez Jr., mga hamtong ang pangedaron ug parehong taga Pasol, Lungsod sa Alcoy.

Si Lovely Mae Besin Rosales, 22, kinsa maoy anak sa biktima, ang nakakita sa mga suspek sa pagpangawat.

Ang gikawat nga mga butang mao ang mga gold nga  kwentas nga mokantidad og P20 mil, ug duha ka singsing nga mobalor og P4 mil, ug mga ariyos nga mobalor og P8 mil.

Lakip sa gikawat ang mga interlink wires, marine plywood, ug PVC elbow nga mokabat sa P2,800.

Gibutyag sa kapolisan sa Lungsod sa Dalaguete nga ang suspek nga si Dionisio maoy kanhi kapuyo sa biktima nga si Besin sulod sa upat ka tuig.

Si Dionisio ug Marciano nasikop sa kapolisan hinungdan nga nauli sa biktima ang mga butang nga nakawat sa mga suspek ug kasamtangang anaa sa buhatan sa kapolisan sa Lungsod sa Dalaguete ug pasakaan og kasong robbery karong adlawa.

Samtang ang laing duha ka suspek nga sila si Nestor Sr. ug Nestor Jr. ang gipangita pa sa kapolisan. - Niña Mae P. Salvacion, CNU Intern (BANAT NEWS)