Kapitan sa Carreta gikiha, P1.4M wa gipanghatag

CEBU, Philippines — Gipasakaan og kasong administratiba sa Ombudsman ang kapitan sa Barangay Carreta, Dakbayan sa Sugbo kay matud pa nidawat kini og P1.4 milyones gikan sa tag-iya og yuta aron ihatag sa mga molupyo alang sa boluntaryong pagbiya sa ilang gipuy-an apan wala ihatag.
Ang pito ka tawo nga nireklamo batok ni Kapitan Eduardo Lauron niangkon nga mga sakop sila sa Medalla Milagrosa Homeowners Association ug nag-okupar sa pribadong yuta nga nahimutang kilid sa usa ka motel.

Gipresentar nila sa Ombudsman ang kopya sa notaryado nga Acknowledgment Receipt nga gipirmahan ni Lauron ug Atty. Glen Villariza nga nagmatuod nga si Lauron nidawat sa P1,470,000 gikan sa abogado niadtong 2013. Si Villariza maoy nagrepresentar sa tag-iya sa yuta nga si Louis Arthur Yap.

Ang maong salapi gitagana aron unta ang matag usa sa 98 ka pamilya nga nagpuyo sa yuta ni Yap panghatagan og tag P15 mil, ug bugti niini, boluntaryo silang mamiya sa ilang gipuy-an. Matud sa mga reklamante nga wala’y nakadawat sa maong kantidad gikan sa kapitan.

Matud sa mga reklamante nga si Lauron nakahimo og Acts Unbecoming of a Public Officer. Apan si Lauron nga nahinabi sa Banat News, kusganong nanghimakak nga nakadawat siya og P1.4 milyones gikan kang Villariza.

Gani matud sa kapitan nga gikiha niya si Villariza sa korte tungod sa paghimohimo og dokumento ug gisundog ra ang iyang pirma kay wala gayud siya kadawat og kwarta gikan sa abogado. Nalipay si Lauron nga napaabot sa Ombudsman ang isyu aron maugkat ang tinuod. Nagtuo si Lauron nga may sagol pamolitika ang pagpasaka og kaso batok kaniya kay siya magpasubli man pagka-kapitan. (BANAT NEWS)