Warriors nagbangis

CEBU, Philippines — Si Kevin Durant mitali og 24 puntos uban ang walo ka rebounds ug pito ka assists sa dihang ang Golden State Warriors mibalik sa karaan nilang dominanteng porma aron paglampaso sa San Antonio Spurs, 113-92, pagsugod sa unang hugna sa NBA playoffs kagahapong adlawa didto sa Oracle Arena sa Oakland, California.

Gawas ni Durant, maayo sab nga labok ang gipakita nilang Draymond Green ug Klay Thompson sa Game 1 sa best-of-seven series aron pagpakita nga bagsik gihapon ang Warriors bisan og wala ang alas nilang si Stephen Curry nga wa kaduwa kay nayayay ang tuhod sukad pa niadtong Marso 23.

Nagbaga ang opensa ni Thompson nga kaduha lamang masipyat sa 13 niya ka itsa aron pagtapos uban ang 27 puntos, samtang ang 7-footer nga si JaVale McGee miamot og 15 puntos, upat ka rebounds ug duha ka blocks sud lamang sa 16 minutos.

Si Rudy Gay maoy nangu sa Spurs uban ang 15 puntos gumikan kay ang ilang leading scorer nga si LaMarcus Aldridge nalimitahan ngadto lamang sa 14 puntos human mipasud lamang og lima sa 12 niya ka tira.

Ang Warriors nagtinguha nga moposte og 2-0 nga bentaha sa ilang pag-host og usab sa Spurs sa Game 2 karong Martes.

Didto sa Eastern Conference, si Serge Ibaka mibahug og 23 puntos ug 12 ka rebounds ug si Delon Wright mibubo og 11 sa iyang 18 puntos sa katapusang kuwarter aron pagtuboy sa Toronto Raptors ngadto sa 114-106 nga kadaogan batok sa Washington Wizards, 114-106.

Si DeMar DeRozan miamot og 17 puntos, sila si C.J. Miles ug OG Anunoby mi-iskor og 12 matag usa, samtang si Kyle Lowry dunay 11 puntos alang sa Raptors nga miputol sa 10 ka sagunson nilang pilde sa pasiunang duwa sa unang hugna sa playoffs.

Balanse kaayo ang ataki sa Raptors nga mibomba sa Wizards og 16 ka tres, upat niini giposa ni Miles ug tagutlo gikan nilang Ibaka ug Wright.

Si John Wall dunay 23 puntos ug 15 ka assists alang sa Wizards, samtang si Markieff Morris mikulit og 22 puntos ug 11 ka rebounds sa pilderong kawsa.

Didto sa Philadelphia, si Ben Simmons mitimbre og 17 puntos, 14 ka assists ug siyam ka rebounds sa iyang playoff debut diin gilampornas sa 76ers ang Miami Heat, 130-103, alang sa ika-17 nilang sagunson nga daog.

Nakab-ot sa 76ers ang impresibong daog bisan og wala gihapon kaduwa ang sinaligan nilang si Joel Embiid.

Gawas ni Simmons, misalida sab silang Marco Belinelli ug Ersan Ilyasova nga nagkumboya og upat ka tres sa ikatulong kuwarter diin ang Sixers mipabuto og 15-0 run aron pagpalurop sa Heat.

Si JJ Redick mihipos og 28 puntos, samtang sila si Belinelli ug Ilyasova nakatigum og 42 puntos alang sa Sixers nga mao gihapon ang mo-host sa Game 2 karong Martes didto sa Wells Fargo Center.

Si Kelly Olynyk maoy nangu sa Heat uban ang 26 puntos. (BANAT NEWS)