Pagdagsa sa mga estudyante sa kolehiyo gilauman

CEBU, Philippines — Ang Commission on Higher Education (CHED) naglaom na nga modagsa ang daghang motungha  unya sa kolehiyo sa pagbukas sa tuig tingtungha niining tuiga. Kini dakong sukwahi sa miaging tuig tungod kay niining panahona mosulod na ang unang hugna sa mga migradwar sa K-12 nga mga tinun-an dinhi sa nasud diin niining maong tuig hingpit na usab nga ipatuman ang Republic Act  10931 kun “Universal Access to Tertiary Education Act of 2017”.

Si Dr. Prospero E. De Vera, III,  officer-in-charge sa CHED-7 miingon nga dako kaayo ang pagkunhod sa mga tinun-an sa kolehiyo sa miaging tuig ug ilang gipaabot ang dako unya nga kausaban niining tuiga nga pagbukas sa klase.

Dugang pa niya nga ang school year 2017-2018 ubos sa 1 milyon lamang ang nagtungha sa mga state universities ug local universities and colleges lukop nasud. Kini walay labot sa mga tinun-an nga nagtungha sa Technical Education and Skills Development Authority o mga vocational school nga mga tinun-an.  Nunot niini, gihangop ni Mayor Paz Radaza ang gipasiugdahan nga information drive caravan sa CHED-7 nga gipahigayon diha sa  Hoopsdome  sa Dakbayan sa Lapu-Lapu.

Si Mayor Radaza sa iyang pamahayag miingon nga ang quality education iyang giisip nga katungod kini nga gihatag sa kagamhanan sa nasud ug dili lamang pagaisipon nga pribilihiyo. (/BDB)(BANATNEWS)