262 ka housing units gi-raffle sa NHA ug Daanbantayan
CEBU, Philippines — Ang National Housing Authority (NHA) ug lokal nga kagamhanan sa lungsod sa Daanbantayan nipahigayon og raffle sa 262 ka housing units alang sa mga qualified beneficiaries diha sa barangay Talisay, Tominjao ug Bagay niadtong Abril 13, 2018.
Ang maong mga housing units nahimutang kini diha sa Green Heights I sa Barangay Tominjao diin 750 ka units ang available for occupancy.
Matud ni Daanbantayan Mayor Vicente Loot nga kini ang ikatulo nga hugna nga gihimo sa NHA human sa naunang duha ka raffles sa housing units sa Maya Park Homes. Ang NHA ug kagamhanan sa Daanbantayan nigahin og 4,363 ka housing units nga nahimutang sa lain-laing mga dapit sa lungsod.
Ang maong kalihukan gitambungan nila ni Loot, NHA General Manager Marcelino P. Escalada Jr., NHA 7 Regional Manager Engineer Gavino D. Figuracion, NHA officials, barangay officials ug uban pang partner agencies ug stakeholders.
Sa wala pa gipahigayon ang raffle, ang NHA ug ang Municipal Social Welfare Development Office nipahigayon og subsob nga information drive sa mga residente sa lain-laing mga barangay sa Daanbantayan.
Ang mga qualified beneficiaries naglangkub sa mga biktima sa Yolanda, mga informal settlers ug mga namuyo sa danger zones.
Ang lungsod sa Daanbantayan adunay 20 ka barangay diin 14 niini ang nahimutang daplin sa dagat samtang duha ka barangay ang Isla.
Kahinumduman nga ang Daanbantayan grabeng gikuso-kuso sa bagyong Yolanda niadtong tuig 2013. (CNU Intern/BDB)(BANATNEWS)
- Latest
