Nag-atang og taxi gitulis
CEBU, Philippines — Gitulis sa nagmotorsiklong kriminal ang magsuon nga nag-atang og taxi sa Upper Mohon, Dakbayan sa Talisay sa niaging kaadlawon.
Ang biktima nga si Elena Castañares, 55, taga Barangay Linao mao lang ang nisumbong sa kapolisan.
Si SPO1 Achilles Cabando sa Talisay City Police Station nibutyag nga gikuyogan lang ni Castañares ang iyang igsuon nga mosakay og taxi paingon sa airport.
Ilang nabantayan nga nagbalik-balik na sa ilang atubangan ang nagmotorsiklo hangtud gihunongan gyud sila ug gitionan og armas.
Nahingangha na lang sila ug igo lang gihatag ang ilang mga butang sama sa upat ka cellphones nga kantidad og P42 mil, tablet nga tag P10 mil ingon man cash nga P18 mil.
Gisubay sa kapolisan ang maong taho apan pakyas sila sa pag-ila sa mga responsable sa krimen.
Ang igsuon ni Castañares ang nilahos na lang sa pagbiyahe paingon sa Davao nga wala na ang iyang mga butang. (/GMR)(BANATNEWS)
- Latest
