Sun-on nato si Bayani Fernando

Daghan kaayo ang nangalipay nga nasakpan ang 15 ka ‘drug users’ nga mga kawani sa Cebu City Hall dihang gipakalitan og drug test ang mga kawani sa Department of Engineering and Public Works kaniadtong miaging semana.

Misamot ang ilang kalipay kay laing duha ka kawani nga nadestino sa City Assessor’s Office nadugang sa mga napositibo sa drug test kaniadtong Biyernes. Sa duha nga napositibo, ang usa niini permanent employee, ug ang usa job order worker. Daygon nako ang pangulo sa City Assessor’s Office kay bisan og bag-o pa nga gi-drug test ang iyang mga kawani, mi-request siya og subli nga drug test kay ang kawani nga iyang gikatahapan, nag-negative man sa una.

Karon, wala na gyud makalikay. Abi kaha niya og dugay pa ang sunod nga drug test mao nga migamit na usab og drugas. Para nako, angay nga taktakon gayud sa katungdanan ang maong mga kawani kay nagpakauwaw lang sila.

* * *

Kinahanglang patutokan gayud ni Mayor Tomas Osmeña ang pagpanghawan sa mga aseras dinhi sa dakbayan sa Sugbo nga giabusohan sa mga bentahuso kaayong mga tawo.

Tiaw mo, dihang gihimoan og “actual inspection” nila ni Raquel Arce ang mga dapit diha sa Taboan area nga sakop sa Barangay San Nicolas, nakita ang pwerteng daghana nga abuso. Mga aseras gitukoran og tindahan, ingon man opisina. Ang usa gud ka opisina diha sa aseras, air-condition pa.

Atong paabuton kay matud ni Raquel Arce, pangulo sa Prevention, Restoration, Order and Beautification Enhancement (PROBE), gihatagan kuno niya og pito ka adlaw ang tag-iya sa mga illegal structure sa pagguba, kay kon dili nila gub-on, sila sa PROBE ang moguba. Aw, tan-awon nato.

Kanunay gyud nako nga gidasig si Raquel nga sundon ang lihok ni Bayani Fernando, pangulo kaniadto sa Metro Manila Development Authority (MMDA) nga walay kahadlok moguba sa mga illegal structures.

Ang rason nga gamay ra og sakop ang PROBE, kon itandi kang Fernando kaniadto, dili gyud lig-on nga basehanan. Bisan dili kaayo dako og kalampusan, basta naglihok. In fairness hinoon ni Arce, naglihok gyud ni siya. Apan angay tingali nga maghimo og ‘pilot barangay’ ang PROBE nga limpyohan nila sa mga illegal structure.

Kon malimpyo na ang mga aseras sa maong barangay, moadto na usab sila sa laing barangay. Sa ingon nga paagi, anam-anam nga mahurot ang mga illegal structures sa tanang barangay.Kay si Mayor Osmeña mura’g wala na ma’y panahon alang sa maong mga gimbuhaton, angay gyud unta nga motudlo siya og iyang kasaligan aron matutokan kanunay kini nga gimbuhaton.