EDITORYAL - SK ug Barangay Elections

Nagsugod na sa pagduso sa ilang tagsa-tagsa ka certificates of candidacies diha sa mga buhatan sa COMELEC ang mga buot mokandidato sa umaabot nga Sangguniang Kabataan ug Barangay elections karong sunod nga bulan. Sama sa gihapon, sari-sari ang mga tawo nga gustong mahimo nga mga opisyal sa barangay. Adunay uban kanila nga mga beterano na sa politika sa barangay, samtang ang uban mao pa’y pagsuway pagdagan aron magpapili og posisyon.

Kon sila maoy pangutan-on, wala’y laing mogawas sa ilang mga baba, kondili, ang tinguhang makaserbisyo sa ilang barangay. Adunay mga nagpasubli nga mobalik kuno sila aron mapadayon ang ilang maayo nga serbisyo. Apan aduna sa’y uban nga mora’g ‘sira nga plaka’ na ang mga linya matag umaabot ang piniliay. Adunay uban nga naa na sa ikatulong termino ug gusto na sab magpapili bisan og dili makamao.

Ang mga ingon niini unta nga klase sa mga politiko dili na angay ibalik sa pwesto. Angay na sila nga mopahuway na lang ug dili na mag-apil-apil sa politika sa barangay. Ang kagawasan sa pagbotar, gigarantiya sa Batakang Balaod ug exercise kini sa usa ka demokratikanhong nasud, sama sa Pilipinas. Sa makausa pa, ang Banat News nag-awhag karon sa katawhan sa paghinay-hinay na og kilatis sa matag kandidato sa inyong barangay.

Ayaw kamo padala sa kasuwaw sa kwarta kay dili imposible nga sila mga drug protector ug umaabot usab nga kurakot nga opisyal. Ang angay’ng botohan mao kadtong mga tawo nga bisan dili ninyo suod, apan makamao nga motimbaya ug dili hambogero sa inyong dapit. Dili kinahanglang maayo nga modiskurso sa kampanya ang angay botohan, kondili, kadtong mga tawo nga menos ra og estorya apan lanog ang pangalan tungod sa kamaayong tawo ug maayo ang binuhatan. Labaw sa tanan, ang plataporma katuohan ug dili imposibleng tumanon.

Busa, karong Mayo 14, balika sa hunahuna kon unsa’y taras sa matag pangalan nga papilian diha sa sample ballots, kay mao ra kini ang higayon nga matarong ang inyong barangay.