Duha positibo sa drug test
CEBU, Philippines - Duha ka mga empleyado sa Cebu City hall ang nagpositibo sa surpresang drug test nga gihimo sa Cebu City Office for Substance Abuse Prevention (COSAP) kagahapon sa buntag.
Apan sa 114 nila ka mga kawani, 98 lang ang mitunga ug duha ang nagpositibo nga tiggamitan og ginadiling drugas. Ang wala makaapil sa drug test giingong absent ug ang uban on-leave.
Matud ni Atty. Eleodoro L. Diaz, OIC sa City Assessors sa miaging tuig lima ka mga kawani ang nagpositibo ug tanan gitaktak sa serbisyo. Kadtong mga nagpositibo kon regular nga kawani ipaagi pa sa proseso ug confirmatory test, apan kadtong job order employee awtomatikong taktakon.
Si Geraldine Miñoza, usa ka job-order nga empleyado sa iyang bahin uyon nga taktakon ang mga kawani nga masakpang tiggamitan og ilegal nga drugas kay matud niya isip kawani sa gobiyerno kinahanglan silang magsilbing sumbanan sa uban. Ang pangulo sa COSAP, Garry Lao, nagkanayon ang tanang empleyado sa buhatan kinahanglan gyud nga mopaubos sa drug test bisan pa kon sila mi-leave sa trabaho.
Sa pikas bahin, si Lao nagkanayon nga aduna silay giandam nga mga seminar batok sa ilegal nga drugas sa matag barangay o tunghaan dinhi sa siyudad.
Lakip na sa ilang napahigayonan og seminar mao ang : Barangay Taptap, Sawang, Tejero, Sambag II, Busay, Sambag I, Poblacion Pardo, T. Padilla, SWU - Phinma, UV Pardo ug Cebu Caretas Inc. nga gisalmotan sa mga kabatan-onan, mga tinun-an, mga kababayen-an ug mga drug surrenderers.
Samtang negatibo ang tanang kawani sa Barangay Bacayan nga gipaubos sa drug test sa miaging Miyerkules.
Matud ni Lao mikunhod gyud ang gidaghanon sa mga kawani sa siyudad nga tiggamitan og ginadiling drugas karong tuiga kon itandi sa miaging tuig. (CNU Intern/IBM)(BANAT NEWS)
- Latest
